Tájikstan basshysy Nursultan Nazarbaevqa: Senimge negizdelgen qarym-qatynasymyz bar

ASTANA. QazAqparat -  Tájikstan Qazaqstanmen strategııalyq qarym-qatynasty odan ary damytýǵa múddeli. Bul týraly búgin Aqordada Elbasy Nursultan Nazarbaevpen ekijaqty kelissóz barysynda Tájikstan Prezıdenti  Emomalı Rahmon aıtty, dep habarlaıdy QazAqparat.

«Qazaqstanǵa kelgen saıyn ásem elorda - Astana kelbetiniń jyldam ózgerip jatqanyn kóremin. Munyń barlyǵy da eń aldymen, Sizdiń dana jáne kóregen saıasatyńyzdyń jemisi. Qazaqstan taýar aınalymy kólemi boıynsha Tájikstannyń jetekshi ekonomıkalyq seriktesteri arasynda ekinshi orynǵa ıe jáne biz elderimizdiń strategııalyq qarym-qatynasynyń barlyq keshenin tabysty damytýǵa múddelilik tanytamyz. Aǵymdaǵy jyly biz dıplomatııalyq qarym-qatynastyń ornaǵanyna 25 jyl tolýyn atap ótemiz. Osy jyldardyń ishinde bizge qoldaý kórsetip keldińiz. Biz dospyz jáne barlyq baǵattaǵy qarym-qatynastardy damytý baǵytynda jumys isteýdemiz», - dep atap ótti Emomalı Rahmon.

Sonymen qatar Tájikstan basshysy Qazaqstan Prezıdentine «Parasat»  ordenimen marapattaǵany úshin shynaıy rızashylyǵyn bildirdi.

«Tájik halqynyń jáne óz atymnan qazir ǵana maǵan tabys etken joǵary nagradańyz úshin alǵysymdy bildiremin. Bul nagrada tek meniń ǵana emes, sonymen birge halqymnyń da eńbegi. Tájikstan barlyq ýaqytta da Sizdiń bastamalaryńyzǵa qoldaý kórsetip keledi. Biz shynaıy dospyz, senimge negizdelgen qarym-qatynasymyz bar. Menińshe, elderimizdiń arasyndaǵy osyndaı qarym-qatynas odan ary da damı beretin bolady», - dedi ol.