Tájikstan azamaty 30 kelige jýyq geroınmen ustaldy

ASTANA. QazAqparat - Jambyl oblysyndaǵy «Qordaı» kedeninen qarasty «Qarasý» keden beketinde esirtki tasymaldamaq bolǵan Tájikstan azamaty qolǵa tústi.

Bul týraly Jambyl oblysy boıynsha Kedendik baqylaý departamentiniń baspasóz qyzmeti.

Ol 30 kelige jýyq geroındi Qazaqstan aýmaǵy arqyly Eýropaǵa alyp ketpek bolǵan.

Departamenttiń Kontrabandaǵa qarsy kúres basqarmasy men «Qordaı» kedeni qyzmetkerleriniń jedel-izdestirý sharalarynyń nátıjesinde 14 shildede saǵat 16:00 shamasynda qylmystyń joly kesildi. Naqtyraq aıtar bolsaq, 1962 jyly týǵan Tájikstan azamatynyń basqarýyndaǵy jasyl tústi «Nıva-Shevrolet» kóliginiń júk salatyn bóliginde kúndelikti turmysta paıdalanatyn gaz ballonyn ekige bólip ishin 27 dana túıinshekpen toltyrǵan. Árqaısysy shamamen 1 keliden asady. Kúdikti zattyń jalpy salmaǵy 30 kelige jýyqtaıdy.

Kedenshilerdiń málimdeýinshe, kúdikti esirtkini satý maqsatynda Eýropa elderine alyp ótpek bolǵan kórinedi. Qazirgi ýaqytta sot saraptamasy taǵaıyndalyp, tergeý amaldary júrgizilýde.