Tájik jýrnalısterine til normalaryn buzǵany úshin aıyppul salady

ASTANA. QazAqparat - Tájikstan úkimeti janyndaǵy til jáne termınologııa komıteti tájik tili normalaryn buzǵan jýrnalısterge aıyppul salatyn bolyp sheshti.

Jeke tulǵalar úshin aıyppul mólsheri 75-ten 100 dollar, zańdy tulǵalar nemese sheneýnikter úshin 150-den 200 dollarǵa deıindi quraıdy. Aıyppuldar jergilikti valıýtamen esepteledi.

Til komıtetiniń basshysy Gavhar Sharıfzodanyń habarlaýynsha, jýrnalıster  beıtanys sózderdi jıi qoldanatyn bolǵan. Sarapshy tiltanýshy Naıma Mýkımzodanyń pikirinshe, Tájikstan BAQ-ta parsy sózderi men osy til termınologııasyn jıi qoldanady.

 «Keı jýrnalıster óz materıaldarynda mundaı 10-ǵa jýyq sózderdi   qoldanady. Ol qarapaıym oqyrmanǵa, tyńdaýshyǵa, kórermenge túsiniksiz. Bul rette memlekettik til normasy óreskel buzylýda. Bizde grammatıka, emle erejesi, saqtaýǵa mindetti memlekettik til normasynyń talaptary bar», - dep málimdedi komıtet tóraǵasy.

Komıtette buzýshylyqty anyqtaý maqsatynda telehabarlar qarap, radıo baǵdarlamalardy tyńdaıtyn, gazetter oqıtyn arnaıy top qurylady.

Komıtet sheneýnikteri tájik tili normalaryn saqtaý mańyzdylyǵy týraly máseleni talqylaý úshin barlyq memlekettik jáne jeke BAQ basshylyǵymen kezdesýge nıetti.

Eske sala ketsek, sáýirdiń sońynda Tájikstan bıligi orys tilinde ákesiniń aty men tegin tirkeýge resmı tyıym saldy.