Tájik-aýǵan shekarasynda áskerı boryshyn ótegen jalǵyz qazaqstandyq áıel Pavlodarda turady
Áskerı adamǵa turmysqa shyqqan órimdeı jas qyz «ne kórsem de, joldasymmen birge kóremin» degen sertten taımapty.
Aıman Ryskeldınany áskerı ómir jas kezinen qyzyqtyrypty. Qurbylaryna bolashaqta otan qorǵaýshy bolamyn degen áziliniń shyndyqqa ulasqanyn ofıtserge turmysqa shyqqanda túsinedi. Tájik-aýǵan shekarasyn kúzetýge toqsanynshy jyldary attanǵan. Joldasy Dýlat Smaıylov zastava basshysy, ózi radıst qyzmetin atqarady. Teńiz deńgeıinen 4400 metr bıiktikte ornalasqan Pamır taýlarynda ómir súrý ońaıǵa túspepti.
Jeti jylyn týǵan jerden jyraqta ótkizgen Aıman Ramazanqyzy eshqashan ókingen emes. Órkenıetten tys qalǵan halyqtyń aýyr tirligi atamekenniń qadirin arttyryp, áskerı ómir ony shırata túsken.
«Áskerı salada qyz-kelinshekter óte kóp. Olar osy er azamattarmen birge qıyndyqtardy kórip jatyr. Soǵan qaramastan, olar úılerinde áıel, ana, jumysta áskerı qyzmetterin atqarady. Sondyqtan osy 8 naýryzda áıelderge zor densaýlyq, ashyq aspan tileımin», - deıdi Qorǵanys isteri departamentiniń qyzmetkeri Aıman Ryskeldına.
Tájik-aýǵan shekarasynda bolǵan qaqtyǵystyń aıaqtalǵanyna talaı jyldyń júzi boldy. Orta Azııa aımaqtaryndaǵy shekara qaýipsizdigin qamtamasyz etýge bizdiń elimizdiń de áskerıleri úles qosty. Qazir Tájikstanda beıbitshilik saltanat qurǵan. Otan qorǵaýshylar qatarynda erlermen birdeı erlik jasaýǵa daıyn Aımandaı qazaq qyzynyń bolǵanyn biz árqashan maqtan tutamyz.