Taza tabıǵat jobasy: Jambylda bir kúnde 140 myń kóshet otyrǵyzyldy
«Taraz qashannan óziniń jasyl jelegimen belgili. Ekologııalyq máselelerdi sheshýde jáne kóne qalanyń eldegi eń jasyl qalalardyń biri retindegi tanymaldylyǵyn saqtaý úshin biz qalalarymyz ben aýyldarymyzdy kógaldandyrý isimen belsendi túrde aınalysýymyz kerek. Búgin oblys boıynsha kem degende 140 myń kóshet otyrǵyzylady. Mundaı jumystarmen tek naýqan kezinde ǵana emes, júıeli túrde aınalysý kerek», - dep atap ótti oblys ákimi.
Bul kúni atalǵan aýmaqta ıgi iske atsalysýǵa jınalǵandardyń qarasy qalyń boldy. Merekelik kóńil-kúıdegi qala turǵyndary túrli aǵashtar otyrǵyzdy. Aktsııaǵa memlekettik qyzmetkerlermen qatar, máslıhat depýtattary, úkimettik emes uıymdar men ekologııalyq qozǵalys ókilderi jáne mektep oqýshylary men ýnıversıtet stýdentteri, eriktiler qatysty. Mundaı sharalar Taraz qalasynyń Baryshan, Shóldala, Taıvan massıvterinde, №13,15 shaǵyn aýdandarynda da uıymdastyryldy. Sondaı-aq, Talas ózeniniń jaǵalaýyn qoqystan tazartý sharalary qolǵa alyndy.
Taraz qalasy ákiminiń orynbasary Ashat Esenalıevtiń aıtýynsha, jalpy 10 gektar aýmaqqa 12 myń kóshet egiledi. Bul jospardyń jartysy búgin oryndalmaq. Mundaǵy topyraq qunarly ári jumsaq. Oblys ákimi qala basshylyǵyna ásirese alǵashqy aılarda kóshetterdiń kútimi men sýarylýyn uıymdastyrýdy tapsyrdy.
Jasyl jelektendirý «Táýelsizdigimizdiń 30 jyldyǵyna –30 myń aǵash» aktsııasy aıasynda júzege asyrylatyn bolady. Degenmen, bıyl Tarazda áldeqaıda kóbirek, 46 myń kóshet otyrǵyzylmaq.
Jalpy 20-21 naýryz kúnderi oblys boıynsha 276,8 myń túp aǵash otyrǵyzý josparlanǵan. Onyń 88,5 myńy qalalar men eldi mekenderde egiledi desek, 29,4 myń kóshet bilim berý uıymdarynda, al 159 myń sekseýil kósheti orman qory jerlerinde otyrǵyzylmaq. Atalǵan aktsııaǵa kem degende 53 myń jambyldyq qatysady dep kútilýde.
Qaraǵash, terek, týıa, boz arsha, shyrsha, qaraǵaı, jemis aǵashtary, talaǵashy jáne qylqan japyraqtylar sııaqty jasyl ekpelerge basymdyq berilýde. Qurǵaq aımaqtarda sekseýil aǵashtary otyrǵyzylýda desek, onyń kóshetteri tabıǵı resýrstar jáne tabıǵat paıdalanýdy retteý basqarmasynyń orman sharýashylyǵy jáne janýarlar dúnıesin qorǵaý mekemeleriniń tálimbaǵynan jetkiziledi.
Sonymen qatar, qala, aýdan aýmaqtaryndaǵy «Taza sý aıdyndary» aktsııasy aıasynda Aqkól, Bılikól, Talas ózeni boıy, Bógetkól sý aıdyndaryn tazalaý jáne «Sý kózderin ashý, bulaqtardy tazartý» aktsııasy aıasynda eldi meken tóńiregindegi sý nysandaryn, sý arnalaryn qoqystan tazartý jumystary júrgiziletin bolady.