«Taza tabıǵat» jobasy: Ózen-kólderden 23,7 shaqyrymnan astam ıesiz aý alyndy

NUR-SULTAN. QazAqparat - QR Ekologııa, geologııa jáne tabıǵı resýrstar mınıstrliginiń Balyq sharýashylyǵy komıteti búgin Almaty, Jambyl, Túrkistan, Qyzylorda jáne Mańǵystaý oblystarynda «Taza tabıǵat» jobasyn iske asyrý aıasynda «Taza sý aıdyndary» tabıǵatty qorǵaý aktsııasyn ótkizdi, dep habarlaıdy QazAqparat vedomstvonyń baspasóz qyzmetine silteme jasap.

«Aktsııa balyq sharýashylyǵy sý aıdyndaryn tastalǵan (ıesiz) balyq aýynan tazartý jáne sý aıdyndarynyń jaǵalaýyn qoqystan tazartý úshin ótkiziledi.

Sý qoımalaryn tazartý úshin ótkizilgen aktsııanyń nátıjesinde atalǵan oblystardaǵy sý qoımalarynan uzyndyǵy 23,7 shaqyrymnan astam ıesiz aý alyndy, 23 tonnadan astam turmystyq qaldyq shyǵaryldy.
Sondaı-aq aktsııaǵa 70-ke jýyq memlekettik ınspektor jáne 781 adam (balyq sharýashylyǵy sýbektileri, qoryqshylar jáne eriktiler) qatysty.
50-den astam qaıyq, 83 kólik jáne basqa da kólik quraldary jumyldyryldy», delingen habarlamada.
«Taza sý aıdyndary» aktsııasyn jarııalaý boıynsha buqaralyq aqparat quraldarynda teledıdardan 8 sóz sóıleý júzege asyryldy, respýblıkalyq jáne jergilikti baspasózde 11 maqala, áleýmettik jelilerde 3 materıal jarııalandy jáne tabıǵat qorǵaý aktsııasynyń qorytyndylary týraly 1 baspasóz konferentsııasy ótkizildi.
Aýdy alypa tastaý jáne jaǵalaýdy qoqystan tazartý úshin júrgiziletin aktsııalar balyq resýrsy men basqa da sý janýarlarynyń tirshilik etý ortasynda qolaıly jaǵdaı jasaýǵa yqpal etedi.