Taza Qazaqstan: almatylyq oqýshylar 1 mıllıonnan astam plastıkalyq qaqpaq jınady

<p>ALMATY. KAZINFORM &mdash; Almatyda plastıkalyq qaqpaqtardy jınaý boıynsha ekologııalyq aktsııanyń alǵashqy maýsymy aıaqtaldy.</p>

Almaty ákimdiginen málim etkendeı, «Taza Qazaqstan» respýblıkalyq baǵdarlamasy aıasynda qolǵa alynǵan naýqanǵa 200-den asa mektep oqýshylary men balabaqsha tárbıelenýshileri qatysty.

Foto: Almaty ákimdigi

Nátıjesinde 1,2 mln qaqpaq jınaldy. Qoǵamdyq máselelerge nazar aýdarý jáne óskeleń urpaqty ekologııalyq mádenıetti qalyptastyrýǵa baǵyttalǵan bastama jastar men olardyń ata-analarynyń tarapynan úlken qoldaý tapty.

— Biz dostarymyzben birneshe apta boıy qaqpaq jınadyq. Bul ekologııa úshin paıdaly ǵana emes, óte qyzyqty is boldy. Endi jınaǵan qaqpaqtarymyz qalamyzda ádemi shyrshalardyń jasalýyna kómektesetinin bilgende, osy jobanyń bir bóligi bolǵanyma maqtanamyn», – deıdi №147 mektep-gımnazııasynyń oqýshysy Tomırıs Namazbekova.

Foto: Almaty ákimdigi

Baǵdarlamanyń basty maqsaty – qorshaǵan ortaǵa uqypty qaraý qundylyqtaryn qalyptastyrý, halyq arasynda joǵary azamattyq jaýapkershilik pen ekologııalyq mádenıetti tárbıeleý.

Uıymdastyrýshylar 2025 jyly plastıkalyq qaqpaqtardy jınaý aktsııasy turaqty naýqanǵa aınalatynyn jetkizdi.

Eske sala keteıik, Memleket basshysynyń bastamasymen qolǵa alynǵan «Taza Qazaqstan» respýblıkalyq baǵdarlamasy eldi mekenderdiń aýmaǵyn kórkeıtýge jáne kógaldandyrýǵa baǵyttalǵan.