«Taza Qazaqstan» aktsııasyna 1 mıllıonnan astam adam qatysty
Mádenıet jáne aqparat mınıstrligi baspasóz qyzmetiniń málimetinshe, «Jasyl aımaq» aptalyǵy aıasynda búkil el boıynsha 330 myńnan astam kóshet otyrǵyzylyp, 500-den astam saıabaq men alań abattandyryldy.
Astanada Memleket basshysy volonterler, jastar uıymdarynyń kóshbasshylary, kreatıvti ındýstrııa jáne ǵylymı zııaly qaýym ókilderimen birge aǵash otyrǵyzdy. «Taza Qazaqstan» aktsııasy aıasynda 8-27 sáýir aralyǵynda aımaqtarda 5 myńnan astam is-shara ótkizilip, oǵan 1 mln-nan astam adam qatysty.
29 sáýir men 4 mamyr aralyǵynda qarttar úıi, ardagerler, jumys barysynda qaza tapqan quqyq qorǵaý organdary qyzmetkerleriniń otbasy turatyn úıler aýmaǵyn abattandyrýǵa baǵyttalǵan «Ónegeli urpaq» taqyryptyq aptalyǵy josparlanyp otyr.
Іs-sharalar Jambyl oblysynda 29 sáýirge, Almatyda 30 sáýirge, Aqtóbe oblysynda 1 mamyrǵa, Shymkentte 2 mamyrǵa, Qostanaı oblysynda 3 mamyrǵa, Túrkistan oblysynda jáne basqa óńirlerde 4 mamyrǵa josparlanǵan. Jastar resýrstyq ortalyqtary, uıymdar, volonterlik qoǵamdastyqtar aktsııa sheńberinde ótkiziletin barlyq is-sharaǵa belsendi qatysady.