Taıtóbe aýylynda saqtyq sharalary barynsha kúsheıtildi – aýyl ákimi

<p>TAITÓBE. KAZINFORM &ndash; Aqmola oblysyna qarasty Qosshy qalasy, Taıtóbe aýylynyń irgesin sý basyp qaldy. Nura ózeniniń arnasynan asqan sý aýyl irgesinen jóńkile aǵyp jatyr.</p>

Alaıda aýyl ákimi Parasat Dosmaǵanbetov jergilikti turǵyndarǵa asa qaýip tónip turmaǵanyn aıtyp berdi.

«2020 jyly aýylymyzdy sýdan qorǵaý úshin 700 metr jerge bóget turǵyzǵan edik. Ol jyldary dál osyndaı mol sý kelmegen. Bıyl mine, ózderińiz kórgendeı, óte kóp sý keldi. Qazir sol bógetti bıiktetip, sýdyń aýylǵa kirýine qarsy úlken jumystar atqarylyp jatyr. Qaýipsizdik sharalaryn barynsha kúsheıtilgen rejımge kóshirdik», - dedi Dosmaǵanbetov.

Sonymen qatar búgin aýyl ákimi Taıtóbe aýylyna Aqmola oblysynyń ákimi Marat Ahmetjanovtyń da arnaıy kelgenin, Astana qalasy men Qosshy qalalyq ákimdikteri arnaıy tehnıkalardy kómekke jibergenin atap ótti.

Foto: Kazinform

«Búgin Astana ákimdigi 37 kamaz, 2 ekskavator, 7 júk salatyn tehnıkany kómekke jiberdi. Sonymen qatar Qosshy qalasynyń ákimdigi de bar tehnıkalaryn aıap jatqan joq. Jalpy, 50-ge jýyq tehnıka aýyldyń qaýipsizdigi úshin jumys istep jatyr. Aýyldaǵy belsendi azamattar da qoldarynan kelgen kómekti berip jatyr. Olar tehnıka júrgizýshilerine, TJD ókilderine, erikti túrde bizge kómektesip jatqan azmattarǵa úıinen sháı, ystyq tamaqtaryn ákelip, tipti, sý jaǵasynda aýzy berik kisilerge aýyzashar berip jatqan turǵyndarymyz da jeterlik. Barlyǵy aýyl úshin qoldarynan kelgenin istep jatyr. Jergilikti polıtsııa da qaýipsizdik sharalaryn qatań baqylaýda», - dedi aýyl ákimi Parasat Mýsabekuly.

Sondaı-aq, ol dál qazir aýylǵa asa qaýip tónip turmaǵanyn, aýyl turǵyndaryna úreıge boı aldyrmaýǵa, jalǵan aqparattarǵa senbeýge shaqyrdy.

«Keıbir kisiler áleýmettik jelige jalǵan vıdeolar jarııalap, jurtty úreılendirýde. Bul durys emes. Shynaıy aqparat kózderine senińizder, úreıge boı aldyrmańyzdar. Barlyq saqtyq sharalaryn kúsheıttik. Dál qazir aýylǵa asa qatty qaýip tónip turǵan joq. Dese de bárimiz saq bolýymyz kerek», - dedi ákim.

Sý resýrstary jáne ırrıgatsııa mınıstri Nurjan Nurjigitov Úkimet otyrysynda Astana irgesindegi úsh eldi mekenge Nura ózeninen tasqyn qaýpi tónip turǵanyn habarlady.

Aqmola oblysynda sý tasqynyna qarsy jumystar jalǵasýda. Bar kúsh Atbasar, Arshaly aýdandary men Qosshy qalasyna jáne Taıtóbe aýyldarynda jumyldyrylýda.