Taıson, Holıfıld, Tszıý: Boks áleminiń juldyzdary Tashkentte bas qosady

<p>Boks áleminiń ańyz adamdary Maık Taıson, Evander Holıfıld pen Kostıa Tszıý bıyl Ózbekstan astanasynda ótetin Dúnıejúzilik boks qaýymdastyǵynyń (WBC) jyl saıynǵy sezine qatysady, dep habarlaıdy&nbsp;<a href="https://kaz.inform.kz/" target="_blank" rel="noopener">QazAqparat</a>&nbsp;menshikti tilshisi.</p>

Ózbekstan Kásipqoı boks federatsııasynyń málimetinshe, WBC óziniń 61-shi konferentsııasyn 12-17 qarasha kúnderi aralyǵynda Tashkentte ótkizýdi josparlap otyr. Alǵash ret Ortalyq Azııada ótetin aıtýly sharaǵa boks áleminiń eń tanymal juldyzdary qatysady.

Beldi sportshy Maık Taıson Tashkentke keletinin málimdedi. Buǵan deıin is-sharaǵa qatysatyndaryn Evander Holıfıld, Kostıa Tszıý syndy boks juldyzdary, sondaı-aq áleýmettik jelide tanymal bloger Abdýrozık rastaǵan bolatyn.

Sez uıymdastyrýshylarynyń deregine súıensek, Tashkentke ózge de ataqty boksshylardyń kelýi kútiledi.

Іs-sharanyń sońǵy kúni – 17 qarashada Tashkenttegi «Hýmo Arena» sport kesheninde aýqymdy kásipqoı boks keshi ótedi.