Taılandta paralımpıadashy óz toıynda qalyńdyǵy men úsh qonaqty óltirdi

<p>Taılandtyq paralımpıadashy ári burynǵy soldat toı kúni qalyńdyǵy men úsh qonaqty atyp óltirip, artynan ózine qol salǵan. <a href="https://kaz.inform.kz/" target="_blank" rel="noopener">Kazinform</a> bul týraly <a href="https://www.bbc.com/news/world-asia-67540210" target="_blank" rel="noopener">VVS</a>-ge silteme jasap habarlaıdy.</p>

29 jastaǵy Chatýrong Sýksýk pen 44 jastaǵy Kanchana Pachýntýek úsh jyl birge turǵannan keıin otbasyn qurý týraly sheshim qabyldaıdy.

Kúıeý jigit toı bop jatqan kezde kenet ketip qalyp, qarý alyp qaıtyp keledi de, áıelin, onyń 62 jastaǵy anasy men 38 jastaǵy ápkesin atyp óltiredi.

Taǵy eki qonaqqa oq tıip, aýrýhanaǵa jetkizildi. Olardyń bireýi mert boldy.

Polıtsııanyń habarlaýynsha, Chatýrong «ishimdikke sylqııa toıyp alǵan», biraq mundaı áreketke ne sebepti barǵany belgisiz. Ol qarýdy byltyr zańdy túrde satyp alǵan, dep tolyqtyrdy olar.

Qonaqtardyń sózinshe, jas jubaılar saýyq keshte daýlasyp qalǵan. Sonymen qatar, Chatýrong qalyńdyǵy ekeýiniń jas aıyrmashylyǵy úshin ózin yńǵaısyz sezinetini habarlanǵan.

Degenmen polıtsııa munyń bári boljam ekenin, aıǵaqtardy jınaǵanyn jáne jaqynda isti jabatynyn málim etti.

Chatýrong byltyr Indonezııada ótken ASEAN paralımpıada oıyndarynda júzýden kúmis medal ıelengen bolatyn. Ol shekarany baqylaý qyzmetinde júrgende oń aıaǵynan aıyrylǵan.

Taılandta jappaı atys jıi kezdespeıdi, biraq qarý ustap júrý keń taraǵan. Ótken aıda Bangkoktaǵy saýda ortalyǵynda bolǵan atys kezinde úsh adam qaza tapty. Al 2022 jyldyń qazanynda burynǵy polıtsııa qyzmetkeri balabaqshaǵa qarý jáne pyshaqpen shabýyl jasap, 37 balany óltirgen.