Taılandta 2 qazaqstandyq sýǵa batyp ketti: Múrdelerdi jetkizý boıynsha kelissóz júrýde

ASTANA. QazAqparat - Taılandta sýǵa batyp ketken Qazaqstannyń 2 azamatynyń múrdesin elge jetkizý úshin kelissóz júrgizilip jatyr. Bul týraly Syrtqy ister mınıstrliginiń resmı ókili Aıbek Smadııarov málim etti, dep habarlaıdy QazAqparat tilshisi.

«Ókinishke oraı keshe keshkisin azamatymyz qaıtys boldy, júregi toqtap qaldy. Árıne, úmit boldy. Jas aǵza bolǵandyqtan barlyǵyn jasadyq. Taı dárigerlerimen keshe sóılestik. Osydan eki kún bir áke-sheshisi Phýketke ushyp bardy. Konsýl olardyń janynda, birge taı dárigerlermen sóılesken bolatyn. 1 maýsym kúni aýrýhanadan «azamattaryńyz aýyr halde, jansaqtaý bólimine tústi» degen qońyraý tústi. Bizdiń azamattarymyzǵa aıtarym bir nárse ǵana - jergilikti bılik sýǵa túspeý týraly habarlama berse, sol erejelerdi saqtaý qajet. Óıtkeni, 3 maýsym kúni týra sol jaǵajaıda taǵy bir azamatymyz sýǵa batyp ketti. Ony qutqaryp úlgermedi. Ekeýiniń de múrdesi Qazaqstanǵa jetkiziledi. Týystarymen jumys istep jatyrmyz. Qujattary rásimdeledi. Áýe kompanııasymen jáne múrdeni jetkizetin ózge de kompanııalarmen kelissóz júrgizip jatyrmyz», - dedi vedomstvonyń resmı ókili.

Aıbek Smadııarov qaıtys bolǵan jigit qalyńdyǵyn qutqaramyn dep sýǵa túsken degen resmı aqparattyń bolǵanyn rastady.

«Biraq, basynda eshkim bolǵan joq. Ony aıta almaımyz. Ne bolsa da sýǵa túspeý qajet. Ókinishke oraı taı qutqarýshylarynyń aqparatyna sáıkes, sýǵa túspeýge qyzyl jalaý shyǵarylǵan kúni TMD azamattary erejeni buzyp sýǵa túsedi eken», - dedi ol.

Buǵan deıin, sýǵa batyp ketken otandasymyzdyń jansaqtaý bóliminde jatqany habarlanǵan edi.