Taıaýda respýblıkalyq bıýdjettiń shyǵystary naqtylanady

NUR-SULTAN. QazAqparat – Jaqyn arada 2021 jylǵa arnalǵan respýblıkalyq bıýdjettiń parametrleri men shyǵystary baǵytyn naqtylaý bolady. Bul týraly QR Qarjy mınıstrliginiń alqa májilisinde vedomstvo basshysy Erulan Jamaýbaev málim etti, dep habarlaıdy QazAqparat tilshisi.

«Sáýir aıynan aldaǵy úsh jyldyq kezeńge respýblıkalyq bıýdjet jobasyn qalyptastyrý boıynsha jumysty bastaımyz. «Nur Otan» saılaýaldy baǵdarlamasynyń is-sharalary men Prezıdenttiń strategııalyq bastamalary tolyqtaı eskeriledi», -dedi mınıstr.

E. Jamaýbaev bıýdjet protsesin jetildirý maqsatynda 2020 jyldyń jeltoqsanynda Bıýdjet kodeksine túzetýler engizilgenin eske saldy.

«Túzetýler bıýdjettik ári strategııalyq josparlaýdyń úılesimdigin, salynǵan qarjynyń ekonomıkalyq serpinin, sondaı-aq memlekettik organdardyń jaýapkershiligin qarastyrady», - dedi vedomstvo basshysy.

Budan buryn habarlanǵandaı, QR Qarjy mınıstri Erulan Jamaýbaev «kóleńkeli» ekonomıka deńgeıin tómendetý jumystary jaıynda baıandady.