Taıaýda «Astana-Atyraý» baǵytynda «Atyraý» júrdek poıyzy júretin bolady

ASTANA. 14 tamyz. QazAqparat - 2013 jylǵy 22 tamyzda Astana vokzalynyń perronynan «Tulpar-Talgo» vagondarynan quralǵan «Astana-Atyraý» baǵytyndaǵy №19/20 júrdek poıyzy attanady.

Bul týraly «Jolaýshylar tasymaly» AQ baspasóz qyzmetinen habarlady.

Jańa poıyz tórt kúnde bir qatynaıdy. Astanadan Atyraýǵa 22 saǵat 57 mınýtta, al Atyraýdan Astanaǵa deıin 22 saǵat 15 mınýtta jetedi. Poıyzdyń jańa quramy 27 vagonnan turady, onyń 22-si jolaýshylar vagony, 2-i «Grand» sanatty (eki oryndyq lıýks), 2-i «Bıznes» sanatty (eki oryndyq) jáne «Týrıst» sanatty (tórt oryndyq) 18 jolaýshy vagony, sondaı-aq, 3 tehnıkalyq, 1 vagon-bar men 1 meıramhana vagony. «Grand» sanatty vagonda múmkindigi shekteýli azamattarǵa arnalǵan bir kýpe qarastyrylǵan.

Vagondar «Jolaýshylar tasymaly» AQ jyljymaly quramynyń tehnıkalyq-resýrsyn jańartý jáne arttyrý baǵdarlamasyn júzege asyrý sheńberinde satyp alynǵan jáne soǵan sáıkes 2014 jylǵa deıin taǵy 420 jolaýshylar vagony satyp alynatyn bolady.