Taıaý jyldary Qazaqstanda jergilikti ózin-ózi basqarý bıýdjeti engiziledi - Ulttyq ekonomıka vıtse-mınıstri Q.Óskenbaev

ASTANA. QazAqparat - Taıaý jyldary Qazaqstanda jergilikti ózin-ózi basqarý bıýdjeti engiziledi. Bul týraly búgin QR Parlamenti Májilisinde «Qazaqstan Respýblıkasyndaǵy jergilikti ózin-ózi basqarýdy damytý máseleleri jónindegi Qazaqstan Respýblıkasynyń keıbir zańnamalyq aktilerine ózgertýler men tolyqtyrýlar engizý týraly» Zań jobasyn tanystyrǵan QR Ulttyq ekonomıka vıtse-mınıstri Qaıyrbek Óskenbaev málim etti.

«100 naqty qadam» Ult josparynyń 97-shi qadamynyń usynystaryna sáıkes aýdandyq mańyzy bar qalalardyń, aýyldardyń, eldi mekender men aýyldyq okrýgterdiń ákimderine jer resýrstaryn basqarý boıynsha qosymsha qyzmetter, sonymen qatar jergilikti qoǵamdastyq jıynyna ákim kandıdatýrasyn taǵaıyndaýǵa kelisim berý, ony qyzmetinen bosatýǵa bastamashy bolý jáne jergilikti mańyzdaǵy ózge de máselelerdi sheshý kezeń-kezeńimen beriledi. 98-shi qadam aıasynda memlekettik bıýdjettik jeke deńgeıi retinde jergilikti ózin-ózi basqarý bıýdjetin kezeń-kezeńimen engizýdi qarastyrady. Birinshi kezeń, 2016-2017 jyldary qosymsha eki salyqty bere otyryp, jergilikti ózin-ózi basqarýdyń salyqtyq áleýetin kúsheıtý usynylýda. Jergilikti ózin-ózi basqarýdyń jeke bıýdjetin engizý 2 kezeńde, 2018 jyldan bastap qarastyrylǵan», - dedi ol.

Sonymen qatar onyń atap ótýinshe, zań jobasynda oblys ortalyqtarynda jáne respýblıkalyq mańyzy bar qalalarda azamattardyń sáıkesinshe bıýdjet jobalaryna talqylaýǵa qatysýy tetikterin engizý qarastyrylǵan.