Taıaý ýaqytta jańa áýe baǵyttary ashylady - Beıbit Atamqulov

NUR-SULTAN. QazAqparat – 2021 jyldyń 4 aıynda áýe kóligimen 2,5 mln jolaýshy tasymaldandy. Bul týraly halyqqa esep berý kezdesýinde QR Indýstrııa jáne ınfraqurylymdyq damý mınıstri Beıbit Atamqulov aıtty, dep habarlaıdy QazAqparat tilshisi.

«Azamattyq avıatsııa pandemııaǵa baılanysty eń kóp zardap shekken salalardyń biri boldy. 2020 jyly tótenshe jaǵdaı kezinde ishki jáne halyqaralyq reıster toqtatyldy. Bul tasymaldaý kólemine áser etti. Osy jyldyń basynan bastap ushýdy birtindep qalpyna keltirgennen keıin negizgi kórsetkishterdiń ósýi baıqalady. 2021 jyldyń 4 aıynda tasymaldanǵan jolaýshylar sany 47 paıyzǵa artty. 2,5 mln jolaýshy tasymaldandy. Áýejaılarda qyzmet kórsetilgen jolaýshylar sany 39 paıyzǵa ósti», - dedi mınıstr.

Onyń atap ótýinshe, búginde ishki reıster tolyǵymen qalpyna keldi.

Sondaı-aq, 14 elmen aptasyna 123 reıs jıiligimen 43 marshrýt boıynsha halyqaralyq reıster jańartyldy.

«Epıdemıologııalyq ahýaldy eskere otyryp, áýe qatynasyn odan ári qalpyna keltirý jóninde dáıekti sharalar qabyldanyp jatyr. Jazǵy jáne eńbek demalysy kezinde azamattarymyzy bul jaıt alańdatyp otyrǵanyn bilemin. Bul baǵytta mınıstrlik jumys istep jatyr. Taıaý ýaqytta vedomstvoaralyq komıssııa sheshiminen keıin jańa baǵyttar nemese azamattardyń jıi qoldanatyn, biraq qazir jabyq turǵan baǵyttardyń ashylǵanyn estısizder. Qazirgi ýaqytta tıisti jumysty kórshiles memleketterdiń mınıstrlikteri deńgeıinde sheship jatyrmyz», - dedi Beıbit Atamqulov.