Taıaý ýaqytta baspana baǵasy qymbattaı ma – sarapshy pikiri

ASTANA. QazAqparat – Elimizde baspana baǵasynyń qymbattaýyna esh sebep joq. Mundaı pikirdi Qazaqstan rıeltorlarynyń birlesken qaýymdastyǵy prezıdentiniń keńesshisi Nına Lýkıanenko bildirdi, dep habarlaıdy QazAqparat tilshisi.

«Baǵanyń kóterilýine sebep joq. Naryq quldyraýyn jalǵastyryp otyr. Sáýirdegi mámile sanynyń artýy baǵanyń tómendeýi aıasynda oryn alǵany anyq. Jańadan salynǵan turǵyn úılerdegi páter quny 0,6 paıyzǵa, qaıtalama naryqtaǵy páterler 1,5 paıyzǵa arzandady», - dedi ol agenttik tilshisine telefon arqyly bergen suhbatynda.

Osy oraıda ol kóptegen sarapshy ótken jyldyń sáýir aıyndaǵy jaǵdaımen salystyra otyryp, birjaqty taldaý jasaıtyndyǵyna aıryqsha nazar aýdardy.

«Bul kórsetkish ótken jyldyń sáýirimen salystyrǵanda jańa turǵyn úıdegi páter baǵasynyń 7,8 paıyzǵa, al qaıtala naryqtaǵy páterdiń qunynyń 3,8 paıyzǵa kóterilgenin bildiredi. Biraq, jalpy naryqtaǵy jaǵdaıdy baǵamdaý úshin sońǵy birneshe aıdyń ishinde baǵanyń artýyna, tómendeýine kóz júgirtip, ne jaǵdaı oryn alyp jatqanyn túsiný qajet. Al tizbekti ındeks ótken jyldyń qarasha-jeltoqsanynan bastap tómendeý tendentsııasyn kórsetip otyr. Jáne de memleket tarapynan dál osy kezeńde naryqty súıemeldeýdiń esh qajeti joq. Naryq taıaý 2-3 aıdyń ishinde óziniń teńgerimdi jaı-kúıine oralady», - dedi Nına Lýkıanenko.