Taıaý Shyǵystaǵy soǵys jaǵdaıynda munaı baǵasy ósti

<p>Izraıl men Gazadaǵy jaǵdaı Taıaý Shyǵystaǵy óndiriske kedergi keltirýi múmkin degen qaýipten dúısenbi kúni munaı baǵasy 4%-ǵa qymbattady, dep habarlaıdy <a href="https://kaz.inform.kz/" target="_blank" rel="noopener">Kazinform </a>agenttigi bul týraly <a href="https://www.bbc.com/news/business-67050612" target="_blank" rel="noopener">BBC </a>jańalyqtaryna silteme jasap.</p>

West Texas Intermediate (WTI) munaıynyń baǵasy barreline 86 dollardan asty. Brent markaly munaı baǵasy da azııalyq saýda-sattyq basynda kóterildi.
Izraıl men Palestına aýmaqtary munaı óndirýshi elder qatarynda emes. Degenmen, Taıaý Shyǵys aımaǵy jahandyq jetkizýdiń úshten bir bóligin quraıdy. HAMAS-tyń senbi kúni Izraılge jasaǵan shabýyly — eki jaqtyń sońǵy onjyldyqtaǵy eń úlken shıelenisýi boldy.

«Munaı baǵasy iri munaı óndirýshi Iran men Saýd Arabııasy elderine taraýy múmkin aýqymdy qaqtyǵystardyń yqtımaldyǵy saldarynan ósip jatyr», - dedi Energetıka jónindegi sarapshy Saýl Kavonıch BBC News-ke.

Kavonıchtiń paıymdaýynsha, mańyzdy munaı saýda joly - Ormýz buǵazy jabylatyn bolsa, álem boıynsha munaı jetkizýdiń besten bir bóligi toqtap qalady. Ormýz buǵazy ekonomıkasy munaı men gaz óndirýge negizdelgen Parsy shyǵanaǵy aımaǵyndaǵy iri munaı eksporttaýshylar úshin óte mańyzdy.

Aldaǵy kúnderi oqıǵalardyń qalaı órbıtindiginiń beımálim bolýy AQSh-tyń qazynashylyq oblıgatsııalaryna jáne daǵdarys kezinde ınvestorlar satyp alǵan dollarǵa ınvestıtsııalardy yntalandyrýy múmkin, deıdi HSBC bankiniń sarapshysy Djeıms Cheo.

Munaı baǵasy osy jyldyń mamyr aıynda barreline 70 dollardan sál ǵana asyp tústi, biraq óndirýshiler naryqty qoldaý úshin óndiristi shekteýge tyrysqandyqtan, sodan beri turaqty túrde kóterildi.

Іri munaı óndirýshi Saýd Arabııasy shilde aıynda óndiristi táýligine mıllıon barrelge qysqartatynyn málimdedi. Munaı óndirýshi elder tobyndaǵy OPEK+ basqa músheleri de baǵanyń tómendeýine qoldaý kórsetý maqsatynda óndiristi qysqartýdy jalǵastyrýǵa kelisti. OPEK+ músheleriniń álemdik shıki munaı óndirisindegi úlesi shamamen 40%-dy quraıdy. Onyń sheshimderi munaı baǵasyna úlken áser etýi múmkin.