Taıaý Shyǵystaǵy qaqtyǵys: Qazaqstan azamattaryn evakýatsııalaýy múmkin be

<p>ASTANA. KAZINFORM &ndash; Syrtqy ister mınıstrligi Taıaý Shyǵys ahýalǵa baılanysty Qazaqstan azamattaryn evakýatsııalaýǵa qatysty túsinik berdi.</p>

«Qazaqstan azamattaryn evakýatsııalaý máselesi pysyqtalyp jatyr jáne ol Syrtqy ister mınıstrliginiń erekshe baqylaýynda. Otandastarymyzdy qıyn jaǵdaıda qaldyrmaımyz, Qazaqstan Respýblıkasynyń sheteldegi árbir azamatyna qamqor bolý – syrtqy saıası vedomstvonyń negizgi mindeti», - dep málimdedi vedomstvonyń resmı ókili Aıbek Smadııarov baspasóz máslıhatynda. 

Resmı ókildiń aıtýynsha, qazir mınıstrlik ýákiletti organdarmen birlesip repatrıatsııalyq reısterdi uıymdastyrý boıynsha ahýalǵa monıtorıng júrgizip otyr. 

«Búginde Izraıldiń halyqaralyq áýejaıy shtattyq rejımde jumys istep tur. Al Iranda barlyq reıs 3 qazanǵa (tańǵa deıin) deıin toqtatyldy. 1 qazanǵa deıin Lıvandaǵy 100-den astam shetel elshilikteri óz azamattaryn evakýatsııalaǵan joq. Onyń ústine Lıvan bıligi tarapynan tıisti buıryq bolǵan joq», - dep tolyqtyrdy A. Smadııarov. 

Buǵan deıin habarlaǵanymyzdaı Taıaý Shyǵystaǵy shıeleniske qatysty QR Syrtqy ister mınıstrligi úndeý jasady.

Sondaı-aq, elimizdiń Izraıl, Iran jáne Lıvandaǵy dıplomattary kúsheıtilgen jumys rejımine kóshkenin habarladyq.

Aıta keteıik, Syrtqy ister mınıstrliginiń málimetinshe, Taıaý Shyǵystaǵy qaqtyǵystan zardap shekken Qazaqstan azamattary joq.