Taıaý Shyǵysta referendýmǵa qatysty daýys berý bastaldy

<p>ASTANA. KAZINFORM &ndash; Jeksenbi kúni Qazaqstannyń Taıaý Shyǵystaǵy dıplomatııalyq ókildikterinde atom elektr stansasynyń (AES) qurylysyna qatysty respýblıkalyq referendýmda daýys berýge arnalǵan saılaý ýchaskeleri ashyldy. Sonymen birge, keıbir memleketterde kúrdeli áskerı-saıası jaǵdaıǵa baılanysty referendým ótkizilmeı jatyr. Iordanııa Hashımıt Koroldiginiń astanasynda jergilikti ýaqyt boıynsha tańǵy saǵat 7:00-de (Astana ýaqyty boıynsha saǵat 9:00) №410 saılaý ýchaskesi óz jumysyn bastady, ol Qazaqstannyń ánuranymen ashyldy, dep habarlady Kazinform agenttiginiń <a href="https://www.inform.kz/ru/golosovanie-po-referendumu-nachalos-v-stranah-blizhnego-vostoka-e4342c" target="_blank" rel="noopener">menshikti</a> tilshisi.&nbsp;</p>

Saılaý ýchaskesi Kaır 99 mekenjaıynda ornalasqan Qazaqstannyń Ammandaǵy Elshiliginde ashyldy. 

Iordanııada turaqty nemese ýaqytsha turatyn jáne jaramdy tólqujattary nemese jeke kýálikteri bar barlyq Qazaqstan azamattary daýys berýge quqyly. 

Ammandaǵy saılaý ýchaskesinde shamamen 50 adam daýys beredi dep kútiledi. Iordanııada turatyn qazaqstandyqtardyń basym bóligi – jergilikti joǵary oqý oryndarynda bilim alyp jatqan stýdentter, ıordanııalyqtarmen nekege turǵan qandastarymyz, sondaı-aq qazaqstandyq dıplomattar men olardyń otbasy músheleri.

Iordanııada, sondaı-aq Taıaý Shyǵystyń birqatar basqa elderinde jeksenbi jumys kúni bolýy saılaýshylardyń qatysýyna áser etýi múmkin. 

Referendým ótkizý jónindegi №410 ýchaskelik saılaý komıssııasynyń tóraǵasy Berik Tólendıev saılaý ýchaskesiniń daýys berýge joǵary uıymdastyrýshylyq daıyndyǵyn atap ótti. 

«Saılaý ýchaskesi tańǵy saǵat 7-de ashyldy, saılaýshylar tizimi boıynsha elýge jýyq qazaqstandyq tirkelgen, olardyń basym bóligi konsýldyq esepte tur. Daýys berý ádettegideı ótip jatyr», - dedi B.Tólendıev.

Qazaqstanda AES qurylysyna qatysty respýblıkalyq referendýmda daýys berý jergilikti ýaqyt boıynsha 20:00-ge deıin (Astana ýaqytymen saǵat 22:00) jalǵasady, sodan keıin ýchaskelik saılaý komıssııasy qorytyndylardy sanaýǵa kirisedi. 

Er-Rııadtaǵy Qazaqstan Respýblıkasynyń Elshiliginde ashylǵan №386 saılaý ýchaskesinde de daýys berý bastaldy, oǵan alǵashqy saılaýshylar kele bastady. 

Sondaı-aq Ábý-Dabıdegi Qazaqstan Respýblıkasynyń Elshiliginde №415 saılaý ýchaskesi ashyldy.

«Birikken Arab Ámirlikterinde turatyn Qazaqstan azamatshasy Balnur Asanova óziniń azamattyq boryshyn ótep, respýblıkalyq referendýmda birinshi bolyp daýys berdi», - dep habarlaıdy elshilik. 

Daýys berý sondaı-aq Qazaqstan Respýblıkasynyń Dýbaıdaǵy (BAÁ) Bas konsýldyǵynda jáne Qazaqstan Respýblıkasynyń Jıdda qalasyndaǵy (Saýd Arabııasy) Bas konsýldyǵynda ashylǵan saılaý ýchaskelerinde ótedi.

Eske sala ketsek, taıaýda QR Syrtqy ister mınıstrligi Ortalyq referendým komıssııasymen birlesip, Izraıl, Iran jáne Lıvandaǵy referendým ótkizý oryndarynyń qyzmetin ýaqytsha toqtatý týraly sheshim qabyldaǵan bolatyn. Mundaı sheshim osy elderdegi kúrdeli áskerı-saıası jaǵdaıǵa baılanysty, sondaı-aq Qazaqstan azamattarynyń qaýipsizdigin qamtamasyz etý maqsatynda qabyldandy.