Tax Free: týrısterge qosymsha qun salyǵyn qaıtarý pılottyq jobasy 1 jylǵa uzartyldy

NUR-SULTAN. QazAqparat – QR QM Memlekettik kirister komıtetiniń týrızmdi damytý maqsatyndaǵy «Tax Free» pılottyq jobasy taǵy bir jylǵa sozylady, dep habarlaıdy QazAqparat vedomstvonyń baspasóz qyzmetine silteme jasap.

«Covid-19 pandemııasyna baılanysty shekteýler men onyń otandyq jáne álemdik týrızmniń damýyna teris yqpalyn eskere otyryp, «Tax Free» pılottyq jobasynyń qoldanylý merzimin 2023 jyldyń 1 shildesine deıin, ıaǵnı 1 jylǵa uzartý týraly sheshim qabyldandy. Sondaı-aq, pılottyq jobany júrgizý geografııasy Almaty, Nur-Sultan jáne Túrkistan qalalaryna keńeıtilip, statsıonarlyq saýda obektileriniń sany ulǵaıtylady», - dep málimdedi MKK baspasóz qyzmetinen.

Endi pılottyq joba Almatyda 8, Nur-Sultanda 4 jáne Túrkistanda 1 iri saýda ortalyǵynda iske asyrylmaq.

Qazirgi ýaqytta normatıvtik-quqyqtyq akt jobasy barlyq qajetti rásimderden ótip, ádilet mınıstrligine kelisýge joldanǵan.

Aıta keteıik, «Tax Free» aıasynda shet elderden kelgen týrıske somasy 20 AEK-iden kem bolmaıtyn taýardy elimizde satyp alyp, EAEO aýmaǵynan tys jerge áketý kezinde QQS somasy óteledi.

Bul júıe barlyq derlik damyǵan elderde engizilgen. Ol týrızmdi damytyp, jergilikti bıznesti qoldaýǵa septigin tıgizedi.

Pılottyq joba elimizde 2022 jyldyń 1 shildesine deıin engizilgen bolatyn. Joba bastalǵaly beri shetel azamattaryna 103 mln teńgege satyp alynǵan taýarlar úshin 8,0 mln teńge kóleminde QQS sommasy óteldi.