«Tax free» túbirteginiń quny qansha bolý kerek

NUR-SULTAN. QazAqparat – QR Memlekettik kirister komıteti «Tax free» júıesi boıynsha sheteldik týrıster qandaı taýardy qosymsha qun salyǵynsyz ákete alatynyn atady, dep habarlaıdy QazAqparat tilshisi.

Sheteldik týrıster úshin Almatydaǵy «Esentai Mall» saýda ortalyǵynda «Tax free» júıesin engizý boıynsha ilki joba qolǵa alynatynyn buǵan deıin de habarlaǵanbyz.

Komıtettiń baspasóz qyzmetiniń habaryna qaraǵanda, bul júıe Eýrazııa ekonomıkalyq odaǵynyń kedendik aýmaǵyna júrmeıdi.

«Tax free» júıesindegi saýda qyzmeti arqyly satyp alynǵan azyq-túlik emes taýarlarǵa ǵana qosymsha qun salyǵy qaıta óteledi. Ol úshin taýarlardyń «Tax free» túbirteginde kórsetilgen quny 20 aılyq eseptik kórsetkishten kem bolmaýy kerek. Satyp alýshy Almaty qalasynyń halyqaralyq áýejaıynyń shekaralyq ótkizý pýnktinen ótkenge deıin satyp alynǵan taýarlardy jáne «Tax free» qujattaryn, satyp alýshyǵa resimdelgen baqylaý-kassalyq mashınanyń túbirtekterin, tólqujatyn jáne otyrǵyzý talonyn kedendik tekserýge kórsetedi», - delingen resmı aqparatta.