Taýly Qarabaqtaǵy ahýal kúrdelenip otyr

NUR-SULTAN. QazAqparat – Elordadaǵy Ázerbaıjan elshiligi Taýly Qarabaqtaǵy ahýalǵa baılanysty jýrnalısterge arnaıy brıfıng ótkizdi, dep habarlaıdy QazAqparat.

«Taýly Qarabaqtaǵy jaǵdaı - óte názik másele. Sondyqtan da shıelenis birneshe jyldan beri jalǵasyp kele jatyr. Osy oraıda Ujymdyq qaýipsizdik týraly shart uıymyna múshe Qazaqstannyń Ázerbaıjan eline moraldyq qoldaý kórsetýin suraımyz. Ázerbaıjan ózge memleketterden áskerı nemese basqa da kómek kórsetýin ótinbeıdi», - dedi Ázerbaıjannyń Qazaqstandaǵy Tótenshe jáne Ókiletti Elshisi Rashad Mamedov.

Sondaı-aq, Rashad Mamedov brıfıng barysynda sheteldik BAQ-tyń resmı aqparatqa saı kelmeıtin málimetterdi jarııalap jatqanyn aıtty.

«Búginde aqparat portaldarynda eki el arasyndaǵy ahýal týraly beıresmı málimetter kóbeıip keledi. Jýrnalıster Ázerbaıjan nemese Armenııa eliniń resmı aqparat portaldarynan emes, derekterdi úshinshi eldiń BAQ betterinen alyp jatyr. Sondyqtan qalam ustaǵan qaýymnan tek resmı aqparatqa súıene otyryp, halyqty durys málimetpen qamtamasyz etýdi suraımyn. Bul - óte mańyzdy. Muny Ázerbaıjan Prezıdenti taıaýda ótken BUU-nyń 75-shi sessııasynda da atap ótken bolatyn. Biz soǵysty qalamaımyz. Degenmen bizge tıesili aýmaq óz menshigimizde qalýy tıis» , - dep atap ótti Ázerbaıjannyń Qazaqstandaǵy Tótenshe jáne Ókiletti Elshisi Rashad Mamedov.

Eske sala keteıik, Ázerbaıjan men Armenııa arasyndaǵy qaqtyǵys 27 qyrkúıekte bastalǵan bolatyn.

Avtor: Álıhan Asqaruly