Taýly Qarabaq: Ázerbaıjan men Armenııanyń SІM basshylary Máskeýge barady
Armenııanyń Syrtqy ister mınıstri Zograb Mnatsakanıan Máskeýge barady. Dál búgin sol jerde Ázerbaıjan men Reseıdiń syrtqy saıasatyna jaýapty basshylarmen konsýltatsııa júrgizedi.
«Kún tártibinde tek áskerı áreketterdi toqtatý máseleleri, jaýyngerlerdiń denesi men tutqyndardy ózara almasý boıynsha gýmanıtarlyq máseleler qaralady», - dep habarlaıdy Armenııa SІM baspasóz hatshysy Anna Nagdalıan.
Aıta keterligi, taıaýda taraptardyń qaqtyǵysy jaıly RF prezıdenti Vladımır Pýtın pikir bildirgen edi. Ol taraptardy áskerı qımyldardy toqtatyp, Ázerbaıjan men Armenııanyń SM basshylaryn 9 qazanda Máskeýge shaqyrǵan edi.
Búgingi tańda Ázerbaıjannyń SІM basshysy Djeıhýn Baıramov ta Máskeýge barady. «QazAqparat» agenttiginiń Bakýdaǵy menshikti tilshisi Bekbaı Taımanov bul týraly Ázerbaıjannyń SІM-ine silteme jasaı otyryp habarlaıdy. Jenevada Ázerbaıjannyń Syrtqy ister mınıstri D.Baıramovtyń EQYU-nyń Mınsk tobyndaǵy teń tóraǵasymen kezdesýi ótken. EQYU-nyń Mınsk tobyndaǵylarǵa Bakýdyń Taýly Qarabaqtaǵy qaqtyǵysty retteý boıynsha pozıtsııasy jetkizilgen.
Eske salsaq, 27 qyrkúıekte Ázerbaıjan men Armenııa Taýly Qarabaqtaǵy jaǵdaıdyń ýshyqqany týraly habarlaǵan edi. Kóp ótpeı QR Syrtqy ister mınıstrligi jaǵdaıǵa baılanysty málimdeme taratty.
Odan bólek Reseı, AQSh jáne Frantsııa EQYU Mınsk tobynyń teń tóraǵalary retinde Jeneva men Máskeýde Taýly Qarabaqtaǵy jaǵdaı boıynsha kelissózder júrgizetini belgili bolǵan.