Táýelsizdik jyldary Pavlodarǵa 37 myńnan astam qandasymyz kóship kelgen

<p>PAVLODAR. KAZINFORM - Elimiz egemendik alǵan jyldan beri Pavlodar oblysynyń aýmaǵyna 37 myńnan astam qandasymyz qaıtyp oralǵan. Olar Monǵolııa, Reseı, Túrikmenstan, Ózbekstan jáne basqa memleketterden kóship kelgen.</p>

Pavlodar oblysyna kóship kelip jatqan qandastarymyzdyń sany eselene túsýde. Byltyr kvota boıynsha 972 adam qonys tepse, jyl basynan 907 adam jańadan qandas mártebesin aldy.

- Pavlodar óńirine táýelsizdik jyldary 37 myńnan asa qandasymyz oraldy. Jyl basynan óńirimizge 907 qandas kóship kelip, qandas mártebesine ıe boldy. Qandastarymyzdyń basym bóligi Monǵolııa, Ózbekstan, Túrkimenstan, Reseı jáne taǵy basqa elderden keldi. Pavlodar oblysy QR Úkimetiniń qaýlysymen bekitilgen qabyldaý óńiri bolyp tabylady. 2023 jyly kóship kelip, kvotaǵa engen qandastarymyzdyń sany 972 adamdy qurasa, bıylǵy qandastardy qabyldaý kvotasy 1252 adamǵa ulǵaıdy. Kazirgi tańda kvotaǵa engen qandastarymyzdyń sany 989 adamdy (223 otbasy) qurap otyr, - dep jaýap berdi Kazinform tilshisiniń saýalyna Pavlodar oblysynyń jumyspen qamtýdy úılestirý jáne áleýmettik baǵdarlamalar basqarmasynyń bas mamany Dastan Vahabov.

Óńirlik kvotaǵa engen qandastarymyz arasynda 244 adam turaqty jumys oryndaryna ornalastyrylǵan. 14 adam kásipkerlik qyzmetpen aınalyssa, 2 adam qaıtarymsyz grantqa ıe bolǵan. Al 50-ge jýyq otbasy baspana satyp alýǵa ekonomıqalyq utqyrlyq sertıfıkatyn ıelenip otyr.

Eske sala keteıik, jyl basynan beri elge 12 325 qandas keldi.