Táýelsizdiktiń jasampaz 20 jyldyǵy - eldigimizdi ornyqtyrý jolyndaǵy alǵashqy kezeńniń mereıli qorytyndysy - respýblıkalyq basylymdarǵa sholý
***
Keshe «Nur Otan» partııasynyń kezekten tys 14-sezi ótti. Oǵan Qazaqstan Respýblıkasynyń Prezıdenti, «Nur Otan» HDP Tóraǵasy N.Á.Nazarbaev qatysyp sóz sóıledi. Elbasy sóziniń tolyq nusqasy «Egemen Qazaqstan» gazetinde «Uly jeńisterge halyqpen birge jetemiz» degen taqyryppen berilgen. «Táýelsizdiktiń jasampaz jıyrma jyldyǵy - eldigimizdi ornyqtyrý jolyndaǵy alǵashqy kezeńniń mereıli qorytyndysy. Biz myńjyldyqtyń úshinshi onjyldyǵyna qadam basý arqyly el damýynyń jańa kezeńinde turmyz. Búginde damýdyń 2020 jylǵa deıingi ındýstrııalyq-ınnovatsııalyq Strategııasyn júzege asyra bastadyq. Ǵasyrlyq máni bar bul joba bizge jańa mindetter men jaýapkershilikter júkteıdi. Onyń ústine, bolashaqtyń ne usynaryn boljap bilý qıyn. Kóptegen elder daǵdarys daýylyna shydas bermeı, shaıqalýda. Sondyqtan bul kezeńdi biz bıik rýhpen, keń tynyspen, tyń serpinmen bastaǵanymyz abzal», - dep atap ótken Memleket basshysy.
«Keshe Munaı jáne gaz mınıstrliginde Qazaqstan Respýblıkasy men Reseı Federatsııasy arasyndaǵy yntymaqtastyq jónindegi Úkimetaralyq komıssııanyń on besinshi otyrysy ótti. Oǵan elimizdiń Munaı jáne gaz mınıstri S.Myńbaev pen Reseı Federatsııasy Ónerkásip jáne saýda mınıstri V.Hrıstenko jetekshilik etti. Otyrysqa komıssııanyń qazaqstandyq jáne reseılik ókilderi, sondaı-aq mınıstrlikterdiń, vedomstvolardyń jaýapty qyzmetkerleri qatysty», - dep jazady «Egemen Qazaqstan» gazeti. Basylymnyń atap ótýinshe, komıssııanyń 15-otyrysynda 30-dan astam máseleler, atap aıtsaq, otyn-energetıkalyq keshen, kólik, ónerkásip, aýyl sharýashylyǵy, atom energetıkasy, áskerı-tehnıkalyq yntymaqtastyq, «Baıqońyr» kesheni boıynsha, ǵylym, bilim jáne jańa tehnologııalar, sondaı-aq qorshaǵan ortany qorǵaý jáne tabıǵatty paıdalaný salasyndaǵy máseleler qaraldy.
***
Jańa jyldyń alǵashqy aıynda josparlanyp otyrǵan saıası saıysbarysynda eshqandaı daý-damaı týyndamaýy tıis. «Aıqyn» gazetiniń jazýynsha, saılaýdy uıymdastyrýshylardyń eń basty maqsaty men muraty osy ekenin jetkizgen OSK tóraǵasy Qýandyq Turǵanqulov Parlament Májilisi men máslıhat depýtattarynyń saılaýyna ázirlik jne ony ótkizý máselelerine arnalǵan semınar-keńes kezinde: «Uıymdastyrýshylar saılaý zańdarynyń buzylý jaǵdaılarynyń aldyn alyp, zań buzylǵan jaǵdaıda kemshilikti birden qalpyna keltirýi tıis», - depti. Bul jaıynda egjeı-tegjeıli bilgińiz kelse, basylymnyń senbilik sanyndaǵy «Saılaýda daý-damaı týyndamaýy tıis» degen maqalaǵa nazar salyńyz.
«AIBA óziniń jańa reıtıngin jarııa etti. Atalmysh uıym barlyq 10 salmaq dárejesi boıynsha myqtylardy iriktep, olardyń tizimin ret-retimen bergen eken. Ókinishke qaraı, úzdikter arasynda Qazaqstan ulttyq qurama komandasynyń músheleri joq. Sońǵy álem chempıonatynda 2 kúmis pen 2 qola medaldi oljalaǵan jerlesterimizdi kóshbasshylar qatarynan keziktire almaýymyz kóńilge kirbiń keltirdi», - dep jazady «Aıqyn» gazeti «Jerlesterimiz jelpine almady» degen taqyryptaǵy maqalasynda. Osy jáne basqa da sport taqyrybynda jazylǵan maqalalardy oqyǵyńyz kelse, «Aıqyn» gazetiniń senbilik sanyn jiberip almańyz.
***
«Kazahstanskaıa pravda» gazetiniń jazýynsha, keshe Qazaqstan Parlamenti Senatynyń Tóraǵasy Qaırat Mámı TúrkPA-nyń Áleýmettik, mádenı jáne gýmanıtarlyq máseleler komıssııasynyń otyrysyna qatysý úshin Astanaǵa kelgen Túrkitildes memleketter Parlamenttik Assambleıasynyń delegatsııa múshelerimen kezdesti. Kezdesý barysynda Q.Mámı túrki álemi halyqtarynyń arasyndaǵy mádenı-rýhanı baılanystardy nyǵaıtýǵa járdemdesetin sharalarǵa qatysqany úshin parlamentshilerge alǵys aıtty.