Táýelsizdiktiń arqasy: almatylyq dáriger armanynyń aqıqatqa aınalǵanyn aıtty

ALMATY. QazAqparat - Táýelsizdiktiń qurdastary – el irgesin eńseli ustaýǵa birden-bir sebepker tulǵalar. Egemendik tańynda dúnıege kelgen órender elmen birge eseıip, boı túzep keledi. Búginde árqaısysy san salada eńbek etip júr. Solardyń biri Pedıatrııa jáne balalar hırýrgııasy ǵylymı ortalyǵynyń endoskopıst-dárigeri Magda Qurbanova.

Magda Qurbanova – Táýelsizdikpen túıedeı qurdas. Ol búginde balalardy emdeıdi. Dáriger. Medıtsına salasyna erekshe den qoıǵan. Bilikti maman bala kezinen aq halat kıip, densaýlyq saqtaý salasynda eńbek etýdi armandaǵan.

«Men Jambyl oblysy, Taraz qalasynyń týmasymyn. Táýelsizdik jyly dúnıe esigin ashqandyqtan, bul jyl men úshin erekshe ystyq. Medıtsınaǵa degen qyzýǵýshylyq bala kezimnen bastaldy. Mektepte tazalyq sektory bolatynmyn, synyptyń jáne oqýshylardyń taza júrýine jaýap berdim. Odan keıin jıi mektepishilik meıram jıyndarda dáriger rólin somdaıtynmyn. Aq halatty abzal jandardy men árdaıym parasatty, júrekteri meıirim men izgilikke toly, adamdarǵa kómegin tıgizetin myqty mamandar dep qabyldaıtynmyn, ózim úshin úlgi etetinmin. Aq halat kııý arman boldy», - deıdi ol.

Ol mektepte júrgen kezinde anasy syrqattanyp qalady, sol kezde dáriger bolamyn degen naqty sheshim qabyldaıdy.

« Besinshi synypta oqyǵanymda aıaqasty anam aýyryp, aýrýhanaǵa tústi. Sol kúnnen bastap dáriger bolamyn dep naqty sheshtim. Qazir, anamnyń jaǵdaıy jaqsy, paıǵambar jasta. Kómegimdi tıgizip turamyn. Bala armanym oryndaldy. Qazir dárigermin. 2013 jyly Qazaq-Reseı medıtsına ýnıversıtetin, balalar hırýrgy mamandyǵy boıynsha bitirip, keıin ınternatýrasynda oqydym. Alǵashqy eńbek jolymdy Taraz qalasynyń №4 qalalyq emhanasynda bastadym. Tórt jyl Pedıatrııa ortalyǵynyń rezıdentýrasynda oqyp, osynda qazir endoskopıst-dáriger qyzmetindemin. Balalar saýlyǵy úshin óz úlesimdi qosyp júrmin dep oılaımyn»,- deıdi dáriger.

Onyń aıtýynsha, Egemendik jastar úshin zor múmkindikterge jol ashty.

«Egemendiktiń Qazaq eliniń jastary úshin bergen múmkindikteri mol, eń bastysy, meniń elim, meniń jerim, meniń Otanym, óz ánuranym, óz eltańbam, qazaq tilim bar. Osyǵan shúkir etemin. Elimiz Egemendigin alǵaly qazaq jastary bilimderin arttyrýǵa múmkindik aldy. Memleket tarapynan jaqsy qoldaý kórsetilip jatyr. Aıta ketsem, 1993 jyldan beri kele jatqan «Bolashaq» baǵdarlamasy, shet elderden tájirıbıe alyp, biliktiligin óz elinde ary qaraı arttyrý, tájirıbıe almasý. Joǵarǵy oqý oryndary, jastarǵa arnalǵan ınnovatsııalyq jobalar ashylyp jatyr. Sonymen qatar elimizdiń egemendi el bolǵaly sport, týrızm, mədenıet salalarynda jasalyp jatqan sharalar jetkilikti. Táýelsiz elimizde bolyp jatqan kún saıynǵy ózgerister men jetistikterge ár kez qýanamyn»,- deıdi Magda Qurbanova.

Keıipkerimizdiń sózinshe, 30 jylda medıtsına salasy da ózge salalar sııaqty qaryshtap damyp keledi.

«Otandyq medıtsınany damytý maqsatynda elimizde kóptegen baǵdarlamalar qabyldandy. Eń alǵashqy baǵdarlama – besjyldyqqa arnalǵan «Halyq densaýlyǵy» memlekettik baǵdarlamasy. Sodan keıin «Densaýlyq saqtaýdy reformalaý men damytýdyń 2005-2010 jyldarǵa arnalǵan memlekettik baǵdarlamasy», «Salamatty Qazaqstan», «Densaýlyq» jáne qazirgi tańda densaýlyq saqtaýdy damytýǵa arnalǵan «Deni saý ult» jobasy iske asyrylyp jatyr. Medıtsına uıymdary sońǵy úlgidegi qural jabydaqtarmen tolyqty. Qazaqstan medıtsınasy damyǵan elderden kem túspeıdi. Naýqasty emdeýde barlyq jańa ınvatsııa qoldanylyp jatyr. Medıtsına mamandary da kásibı ósip keledi. Osynyń bári Táýelsizdiktiń jemisi dep bilemin»,- deıdi ol.

Sóz arasynda, ol mamandyǵynyń ereksheligine toqtaldy.

«Mamandyǵymnyń mindeti — adamnyń ishki aǵzasyn zertteý, ıaǵnı asqazan ishek joldarynyń aqaýyn anyqtaý. Bólimde túrli endoskopııalyq zertteýlerdiń kesheni jasalady. Birqataryn aıtqanda, ezofagoskopııa (óńeshti tekserý), gastroskopııa (asqazandy tekserý), dýodenoskopııa (toq ishekti tekserý), kolonoskopııa, Epıfarıngoskopııa (muryn jutqynshaqty tekserý), Larıngoskopııa (keńirdekti tekserý), Traheobronhoskopııa ( traheıa jáne bronhty tekserý) jáne taǵy basqalary»,- deıdi spıker.

Onyń aıtýynsha, ómirlik ustanymy adal joldan taımaý.

«Alǵan qoıǵan maqsatym adal joldan taıynbaı, elime eńbek etý. Halyq saýlyǵyna, balalar densaýlyǵyn nyǵaıtýǵa óz úlesimdi qosyp, paıdamdy tıgizý. Qazaqstannyń táýelsizdik jarııalaǵan jyly dúnıege kelý men úshin úlken baqyt. Sondyqtan Otanymyzdyń damýy men órkendeýine óz úlesimizdi qosý óte mańyzdy»,- dep atap ótti Magda Qurbanova.

Dáriger mereke qarasańynda óziniń júrek jardy tilgen aıtty.

«Barlyq jetistigim - táýelsizdiktiń arqasy. Egemen elde biz de emin-erkin ómir súrip, arman-asýlarymyzǵa qol jetkizip kelemiz. Osydan artyq qandaı baqyt kerek! Táýelsizdiktiń qurdasy retinde men de óz elimniń damýyna óz úlesimdi qosamyn. Bizdiń endigi mindetimiz - halyqqa qaltqysyz qyzmet kórsetip, elimizdiń odan ári órkendeýine atsalysý.

Táýelsizdik — qazaq halqynyń bostandyqqa umtylǵan asqaq armany men ór rýhynyń jeńisti jemisi. Mereıli mereke qarsańynda elimizge tynyshtyq, jurtymyzǵa amandyq, ár otbasyǵa baqyt, denderine saýlyq tileımin! Qadamy batyl, qaryshty damyǵan elimizdiń táýelsizdigi baıandy bolǵaı!»,- dep tilek bildirdi.