Táýelsizdiktiń 30 jyly aqmolalyqtar úshin tabyspen eselenýde

KÓKShETAÝ. QazAqparat - Táýelsizdiktiń 30 jyly aqmolalyqtar úshin tabyspen eselenýde. Oblys elimiz boıynsha aýyl sharýashylyǵy ónimderin óndirýde kóshbasshylar qatarynda, dep habarlaıdy QazAqparat tilshisi oblystyq ishki saıasat basqarmasyna silteme jasap.

Aqkól aýdany Dombyraly aýylynda sút-taýar fermasy salynýda. «Aqkól Agro» seriktestiginiń bas dırektory Mádı Esqaraevtyń aıtýynsha, 300 bas saýyn sıyrǵa arnalǵan nysan aǵymdaǵy jyldyń tórtinshi toqsanynda paıdalanýǵa beriledi.

Tselınograd aýdanynda «Sıvka-Býrka» sharýa qojalyǵy 2015 jyldan bastap jumys isteıdi. Bes jyl buryn «Qulan» baǵdarlamasy boıynsha birneshe bas jylqy satyp alýǵa nesıe aldy. Sharýashylyq basshysy Igilik Tálkenov «Sybaǵa» baǵdarlamasy boıynsha 138 bas saýyn sıyr, alty buqa gereford satyp alǵanyn aıtýda. Búginde mal basy 400 basty quraıdy.

«Aıdar» sharýa qojalyǵy Ereımentaý aýdany Novomarkovka aýylynyń mańynda ornalasqan. Bıyl egistik alqaby 400 gektardan 600 gektarǵa deıin ulǵaıtyldy, 300 gektar jerden júgeri, 150 gektarǵa sýdan shóbin, 150 gektardan jońyshqa jınap aldy. Jem-shóp «Jańa bereke» seriktestigindegi mal bordaqylaý alańyndaǵy úsh myń basy iri qaraǵa arnalǵan.

Osy aýylda «Novomarkovka Agro-2010» JShS ornalasqan. Seriktestik dırektory Serik Іzbasarov bıyl 12 myń gektar egistik alqaptan dándi daqyldar jınalǵanyn, úsh myń gektar alqap parǵa qaldyrylǵanyn aıtýda.

«Ótken jyly biz dándi daqyldardy tazalaý jáne keptirý boıynsha jabdyq ornattyq. Astyq qoımasy jóndeldi. Osynyń arqasynda bıylǵy altyn astyqty shashpaı tókpeı jınap aldyq. Sýbsıdııa túrinde qoldaý kórsetkeni úshin memleketke alǵysymyz sheksiz», - dedi seriktestik dırektory.

Aıta keteıik, elimizdiń negizgi astyq egetin óńirleriniń biri sanalatyn oblys soltústik bóliginde alǵashqylardyń biri bolyp egin oraǵyn aıaqtap otyr.