Táýelsizdiktiń 30 jyldyǵyna oraı «Kóshpendiler» trılogııasy Qazaq radıosynan berilýde

NUR-SULTAN. QazAqparat - Aqparat jáne qoǵamdyq damý mınıstrliginiń qoldaýymen jáne Qazaq radıosynyń bastamasymen kún saıyn «Kókjıek» baǵdarlamasy jazýshy Іlııas Esenberlınniń «Kóshpendiler» trılogııasynyń aýdıo nusqasyn berýde, dep habarlaıdy QazAqparat.

Jobaǵa Ulttyq aýdarma bıýrosy da qoldaý kórsetken.

Qazaq handyǵynyń qurylymy men saıası ómirine negizdelip jazylǵan tarıhı epopeıanyń aýdıo nusqasyn Qazaq radıosynyń ardager dıktory Búrkit Bekmaǵambetov dybystap shyqqan.

«Egemendikti, el men jerdi bizge aman jetkizgen handar men bahadúr batyrlardyń erligi júıelep jazylǵan «Kóshpendiler» tarıhı trılogııasyn Táýelsizdik toıy qarsańynda arnaıy baǵdarlama efırinen shyǵarý Qazaq radıosynyń Táýelsizdik toıyna qosqan bir úlesi»,- dedi «Qazaq raıolary» JShS bas redaktory – «Qazaq radıosy» radıo arnasynyń dırektory Dýlat Abıbýllaev.

Sońǵy eki jylda Qazaq radıosy efırinde Tahaýı Ahtanovtyń, Hamza Esenjanovtyń, Ázilhan Nurshaıyqovtyń, Júsipbek Aımaýytovtyń, Ábish Kekilbaevtyń, Qalıhan Ysqaqtyń, Sáken Júnisovtiń, Berdibek Soqpaqbaevtyń, Sábıt Muqanovtyń, Sherhan Murtazanyń, Muhtar Maǵaýınniń eńbekteri men áńgimeleri aýdıo kitap formatynda berilgen.

Aıta keteıik, áıgili «Kóshpendiler» týyndysy - keńestik kezeńde ulttyh tarıhymyz týraly jazylǵan alǵashqy kólemdi shyǵarmalardyń biri.

Іlııas Esenberlınniń «Kóshpendiler» trılogııasyna jazýshynyń 1969 jyly qazaqtyń sońǵy hany Kenesary týraly «Qahar» romany men «Almas qylysh» jáne «Jantalas» romandary kiredi.

«Kóshpendiler» trılogııasyn orys tiline aýdarǵan Morıs Sımashko.

Kitaptyń tek orys tilindegi nusqasy 12 ret qaıta basylyp shyǵyp, jalpy tırajy 1,5 mıllıonnan asty.