Táýelsizdiktiń 30 jyldyǵyna oraı 1149 is-shara ótkizildi - BQO

ORAL. QazAqparat – Batys Qazaqstan oblysynda Qazaqstan Respýblıkasy Táýelsizdiginiń 30 jyldyǵyn merekeleý jóninde is-sharalar jospary daıyndalyp, tujyrymdamaǵa sáıkes ótkizilýde, dep habarlaıdy QazAqparat.

BQO ishki saıasat basqarmasy basshysynyń mindetin atqarýshy Darhan Qadralıevtiń aıtýynsha, mereıtoılyq jyldyń birinshi jartyjyldyǵynda óńirde sanıtarlyq talaptardy saqtaı otyryp, 100 myńnan astam adamdy qamtıtyn 1149 is-shara uıymdastyryldy. Onyń ishinde respýblıkalyq deńgeıde - 6, oblystyq deńgeıde - 148, qalalyq jáne aýdandyq deńgeıde - 968 is-shara ótkizildi.

Mereıtoıǵa oraı Syrym aýdanynyń ortalyǵy Jympıtyda 3 baǵyttan turatyn dástúrli «ІV respýblıkalyq Qadyr oqýlary» baıqaýy uıymdastyryldy.

4 maýsym – Qazaqstan Respýblıkasynyń rámizderi kúnine oraı belsendi jeńil atletter, óńirdiń jas veloshabandozdary, jaıaý marshtaǵy áskerıler jáne baıdarka esýden olımpıada qatysýshysy Aleksandr Dergýnovtyń atsalysýymenn aýqymdy kólemdegi «Jelbire, kók baıraǵym!» tý berý estafetasy ótti.

Sondaı-aq, «Jas sarbaz» synyptary oqýshylarynyń arasynda áskerı-patrıottyq tárbıeni damytý jáne áskerı qyzmetti nasıhattaý, oqýshylardy áskerı-qoldanbaly jáne tehnıkalyq daıyndyqqa daǵdylandyrý maqsatynda 325 oqýshyny qamtyǵan «Jas sarbaz-2021» áskerı-sporttyq oıynynyń ótkizilgenin aıta ketken jón.

Mereıtoı aıasynda oblysta ıllıýstratıvti kitap kórmeleri, balalar jáne jasóspirimder, jastar teatry, ólketaný festıvalderi uıymdastyryldy.

Munymen qatar «El tarıhy» atty derekti fılmder daıyndalýda. Apta saıyn «AQJAIYQ» telearnasynda «Táýelsizdik shejiresi» - «Dostoıanıe respýblıkı» aıdarymen beınerolıkter kórsetilip jatyr. Jergilikti arnalardan Elbasy N.Nazarbaevtyń Táýelsizdikke qol jetkizý jolyndaǵy júrip ótken joly jaıynda sıýjetter berilýde.