Táýelsizdiktiń 30 jyldyǵyna «Balapan» telearnasynyń tartýy
Jobalar egemen eldiń tarıhy men mádenıeti, ǵylymy men bilimi, belesteri jáne tabystary týraly qyzyq ári bala paıymyna laıyqtalǵan. Olardyń 8-i anımatsııalyq joba bolsa, 2-i tanymdyq baǵdarlama.
«Balapan»-nyń kórermenderi «Sultan Beıbarys» (3D) mýlthıkaıasynan bahadúr Beıbarystyń balalyq shaǵynan Mysyr Sultany bolǵanǵa deıingi ómirimen tanyssa, «Qaharmannan» (3D) túrkiler dáýirine saıahattap, babalarymyzdyń jankeshti erligin kóredi. Basty qundylyǵymyz –Táýelsizdigimizdi keler urpaqqa tabystaýdy negizgi ózek etken «Altyn kilt» (2D) anımatsııalyq serıaly búldirshinderdi otansúıgishtikke baýlysa, «Ǵaryshker bala Jiger» (2D) arqyly jas jetkinshekter Qazaqstannyń ǵarysh salasyndaǵy jetistikteri men Baıqońyr ǵarysh aılaǵy týraly qyzyq derekterdi biledi. Al «Sen bilesiń be?» tanymdyq baǵdarlamasy Táýelsizdigimizdi alǵannan keıingi eleýli oqıǵalardy, tuǵyrly tulǵalardy tanı túsýge yqpal etedi.
Mereke kúnderi telearnadan oıyn-saýyq, oqý-tanymdyq mýlthıkaıalardy da tamashalaýǵa bolady. «Táp tátti hıkaıada» (3D) Konfı men Alýa qorshaǵan ortany tanystyrsa, «Tompıdegi» (2D) Álı men Aısha zattardyń pishini men qasıetterin uǵyndyryp, mánin ashyp beredi. Telearna bıyl álemdik trendke aınalǵan komıks janryn da nazardan tys qaldyrmady. Osylaısha tuńǵysh ulttyq erekshelikterimiz eskerilgen, «Erjúrek saqshylar» (2D) atty komıks ázirlep jatyr. Sonymen qatar, batyrlar jyryn arqaý etken shytyrman oqıǵaly «Er Tarǵyn» (3D) mýltserıaly kórermenge usynyldy. Sonymen qatar, kishkentaı kórermender tanymdyq «Birge oınaıyq!» baǵdarlamasyn tamashalaı alady. Baǵdarlamany erekshe júrgizýshi, tanymal tık-toker Samal Smahan júrgizedi. Baǵdarlamada balalar sýret salady, armandaǵan maman ıesi bolady jáne álemdi sharlap, qyzyq maǵlumattarmen tanysady.
Aıta ketelik, jyl basynan beri «Balapan» telearnasy jalpy 42 joba óndirdi. Telearna sonymen qatar, «Táýelsizdiktiń 30 jyldyǵyna 30 tartý!» shyǵarmashylyq baıqaýyn uıymdastyrdy. Jyl boıy ótken bul baıqaýda kishkentaı kórermender azattyq týraly paıym-túsinigi men keleshek armandary jaıly aıtyp, túrli ónerlerimen bólisti. Baıqaý telearna efıri men áleýmettik jelilerdegi resmı paraqshalarynda qatar júrgizildi. Jeńimpazdar arnaıy syılyqtarmen marapattaldy.