Táýelsizdiktiń 30 jyldyǵy: SQO-da qandaı sharalar uıymdastyrylady
SQO Mádenıet, tilderdi damytý jáne arhıv isi basqarmasynyń málimetinshe, óńirde el Táýelsizdiginiń 30 jyldyq mereıtoıyna arnalǵan is-sharalar legi Aqan seri atyndaǵy oblystyq fılarmonııanyń kontserttik baǵdarlamasymen bastaý aldy. Alda ǵylymı konferentsııalar, taqyryptyq kórmeler jáne respýblıkalyq aqyndar aıtysyn ótkizý josparlanǵan.
«Oblystaǵy qazaq jáne orys drama teatrlary mereıtoıǵa oraı premera ázirlep jatyr. S.Muqanov atyndaǵy qazaq sazdy-drama teatry «Elim-aı» spektaklin sahnalamaq. «Táýilsizdik qurdastary» oblystyq án baıqaýyn, «Gaýhartas» qazaq halyq aspaptary orkestriniń ІІІ respýblıkalyq festıvalin, «Táýelsizdik tolǵaýy» atty sýretshilerdiń halyqaralyq plenerin, «Babalar amanaty» festıvalin jáne «Qudyretti týǵan jer» kórmesin ótkizemiz», - deıdi basqarma basshysynyń mindetin atqarýshy Dosbol Ábdirıisov.
S.Muqanov atyndaǵy oblystyq ámbebap-ǵylymı kitaphanada el mereıtoıyna oraı oqýshylarǵa, stýdentterge jáne barlyq oqyrmandarǵa túrli formatta ekskýrsııalar, kórmeler men lektsııalar ótedi. Jalpy bıylǵy balalar men jasóspirimderdiń kitap oqýyn qoldaý jylyna oraı kitaphanalarda 250-den astam is-shara uıymdastyrylmaq.
«Ǵ.Músirepov atyndaǵy balalar men jasóspirimder kitaphanasynda memlekettik-jekeshelik áriptestik jobasy júzege asyp jatyr. Nátıjesinde kitaphana-bilim berý klassteri qurylmaq. Balalarǵa 13 baǵyt boıynsha qyzmet kórsetiledi. Jalǵa berý nátıjesinde kitaphananyń materıaldyq-tehnıkalyq bazasyn, kitap qoryn tolyqtyrýǵa múmkindik bar», - deıdi Dosbol Ábdirıisov.