Táýelsizdiktiń 30 jyldyǵy: «Egemen Qazaqstan» gazetiniń «Atameken» ekspedıtsııasy máresine jetti
Táýelsizidktiń 30 jyldyǵyna oraı, «Rýhanı jańǵyrý» baǵdarlamasy aıasynda ótken «Atameken» ekspedıtsııasynyń qorytyndy jıyny Ulttyq kitaphanada boldy. Jıynǵa «Egemen Qazaqstan» gazeti Basqarma tóraǵasynyń orynbasary Aıbyn Shaǵalaq, «Kazahstanskaıa pravda» gazetiniń bas redaktory Asyl Saǵymbekov, «Ana tili», «Ulan» gazetteri, «Aq jelken» jýrnalynyń bas redaktorlary, kitaphana ujymy, BAQ ókilderi qatysty.
Jıyn barysynda «Egemen Qazaqstan» gazeti Basqarma tóraǵasynyń orynbasary Aıbyn Shaǵalaq «Atameken» ekspedıtsııasy jaıly tolyǵyraq aıtyp berdi.
«Atameken» ekspedıtsııasy «Egemen Qazaqstan» gazeti men «Kazahstanskaıa pravda» gazetteriniń uıymdastyrýymen ótkizildi. Tamyz aıynyń sońynda Nur-Sultan qalasynda bastaý alǵan ekspedıtsııanyń negizgi maqsaty – el óńirleriniń kórikti tarıhı, mádenı nysandaryn, kópshilik bile bermeıtin kıeli oryndaryn keńinen nasıhattaý, elge taǵy bir márte kórsetý boldy. Sonymen birge, týrızm salasynda jetken jetistikter, otandyq týrızmdegi keıbir ózekti máselelerdi jazyp jetkizý boldy.
«Ekspedıtsııa eki baǵytta júrdi. Bir baǵyty Nur-Sultan qalasynan ortalyq Qazaqstanǵa, ıaǵnı, kıeli Ulytaýǵa baryp, odan ary batys, ońtústik óńirlerge qaraı bet bursa, ekinshi baǵyty Kókshetaý, Oqjetpes, Býrabaı arqyly soltústik Qazaqstan, odan ary shyǵys arqyly júrip, eki baǵyt Almaty qalasynda túıisti. Ekspedıtsııa barysynda baıtaq elimizdiń kıeli oryndaryna arnaıy baryp, araladyq. Solar týraly jáne basqa da keleli máselelerdi kóterip, maqalalar jazdyq. Sol arqyly jergilikti bıliktiń nazaryn aýdardyq dep oılaımyn. Maqalalar «Egemen Qazaqstan», «Kazahstanskaıa pravda» gazetterinde jarııalandy», - dedi Aıbyn Shaǵalaq.
Onyń aıtýynsha, ekspedıtsııa quramyna eki gazettiń óńirlerdegi menshikti tilshileri, jergilikti ákimdikterdiń músheleri, zııaly qaýym ókilderi kirip otyrdy.
«Ekspedıtsııa oljaly boldy degen oıdamyn. Bizdiń dittegen maqsatymyz oryndaldy dep otyrmyz», - dep túıindedi ol.
Jıyn barysynda sóz alǵan «Egemen Qazaqstan» gazeti Almaty qosynynyń jetekshisi Júsipbek Qorǵasbek elimizdiń basqa óńirlerin aıtpaǵanda, bir Almatynyń ózinde kóptegen tarıhı oryndar bar ekenin atap ótti.
«Almatydaǵy tarıhı oryndardyń ústine qurylystar salynyp ketken. Árıne, olardy biz qazir qazyp ala almaımyz. Degenmen, qundy derekter bizge jetýde. Mysaly, Almatydaǵy «Tastaq», «Aqsaı» yqshamaýdandarynda tarıhı oryndar bar. Onyń bári topyraqtyń astynda jatyr. Sondaı-aq, búgin Almaty irgesindegi «Saq qorǵanyna» bardyq. Onda qanshama tóbeler, qorymdar jatyr. Sonyń ózinen úlken tarıhty bilýge bolady. Bul jerde uzaq jyldarǵa jetetin jáne mol qarjyny qajet etetin jumystar tur. Mine, biz ekspedıtsııa arqyly osyndaı basty máselelerge oqyrmannyń, bıliktiń, jalpy halyqtyń nazaryn aýdara aldyq dep oılaımyn. Jalpy bizdiń maqsat osy bolatyn. Maqsat oryndalǵan sııaqty»,- dedi J.Qorǵasbek.
Al «Ana tili» gazetiniń bas redaktory Qalı Sársenbaı sóz arasynda, Almatydaǵy «Kóktóbeniń» basynda Kenesary han shatyryn tikken jer bar ekenin atap ótti.
«Kóktóbe» - ol bizdiń kıeli jer. Onda Kenesary han shatyryn tigip, otyrǵan jeri bar. Sondyqtan ol jerdi oıyn-saýyq quratyn nemese jyn oınaq salatyn orynǵa aınaldyrýǵa bolmaıdy. Ol jerdi qorshaýǵa alý kerek. Keıingi kezde ol jerde mádenı is-sharalar ótip keledi. Menińshe ony qoıý kerek. Ekspedıtsııanyń maqsaty da ár óńirdiń tarıhı jerine kóńil bólý ǵoı. Sondyqtan osyndaı máselelerdi taldap, aıtqan durys shyǵar dep oılaımyn»,- dedi ol.
Kesh sońynda «Atameken» ekspedıtsııasynyń músheleri jýrnalısterdiń qoıǵan suraqtaryna jaýap berdi. «Egemen Qazaqstan» respýblıkalyq gazeti» aktsıonerlik qoǵamynyń qos basylymy Táýelsizdiktiń 30 jyldyǵyna arnalǵan «Atameken» mádenı-aǵartýshylyq ekspedıtsııasyn bastaǵanyn buǵan deıin jazǵan bolatynbyz.