Táýelsizdiktiń 30 jyldyǵy: Aqmola oblysynda jas pedagogtar forýmy ótti

KÓKShETAÝ. QazAqparat - Aqmola oblysynda Táýelsizdiktiń 30 jyldyǵyna arnalǵan «Egemen eldiń ustazy» atty jas pedagogtar forýmy ótti, dep habarlaıdy QazAqparatt tilshisi oblystyq ishki saıasat basqarmasyna silteme jasap.

Forým jas pedagogtardyń pedagogıkalyq is-áreket protsesinde tulǵalyq-baǵdarly jáne kásibı ósýin damytý maqsatynda uıymdastyrylyp otyr.

«Sharaǵa pedagogıkalyq eńbek ardagerleri shaqyrylyp, «Táýelsizdik jolyndaǵy jańa menedjer» oblystyq debat týrnıriniń qatysýshylary, «Jarqyn bolashaqqa baǵdar» jas pedagogter baıqaýynyń syrttaı kezeńiniń jeńimpazdary, táýelsizdik qurdastary, «Daryndy balalarǵa – talantty ustaz» baıqaýynyń respýblıkalyq kezeńiniń jeńimpazdary men qatysýshylary, sportpen, sýret salýmen, qolónermen, án salýmen jáne shyǵarmashylyqtyń basqa da túrlerimen aınalysatyn jas talantty pedagogter qatysty», - dedi vedomstvodan.

Jas pedagogterdiń IV oblystyq forýmyn ótkizý aıasynda tanystyrý alańynda forým qatysýshylarynyń shyǵarmashylyq jumystary nazarǵa usynyldy.

Kásibı belesterdi baǵyndyrǵan jáne shyǵarmashylyq qyzmette joǵary nátıjege qol jetkizgen jas pedagogtar marapattaldy.

Sonymen qatar, Aqmola oblysynyń jas pedagogtar odaǵy ánuranynyń tusaýkeseri bolyp, qatysýshylar jappaı oryndady.