Táýelsizdiktiń 25 jylynda prezıdenttik bılik ózin-ózi aqtady - ǵylym kandıdaty
«Prezıdent elimiz úshin asa mańyzdy, taǵdyrly másele usynylyp otyrǵanyn atap ótti. «Qazir zamannyń dıdary ózgerdi. Biz de ózgerýge tıispiz. Sol sebepti, memlekettik basqarý júıesin de jańǵyrtatyn kez keldi. Men eldiń múddesi men zamannyń talabyn, urpaqtyń bolashaǵyn oılaı otyryp, baılam jasadym», dedi Elbasy.
Úndeýde saıası júıeni jańalaýdaǵy sabaqtastyq ustanymy saqtalǵan. Ol Qazaqstan qoǵamynyń demokratııalyq baǵytta damýyn odan ári tereńdetýde jatyr. Buǵan deıin qabyldanǵan 5 ınstıtýtsıonaldyq reformanyń besinshisinde kórsetilgendeı, ashyq Úkimet ıdeıasy endi naqty iske asatyn bolady. Bul da sabaqtastyq kórinisi. Sonymen qatar bul jańarý Qazaqstan Respýblıkasynyń órkenıetti saıası damýǵa túbegeıli bet burǵanyn bildiredi dep oılaımyn.
Buryn Prezıdenttiń quzyrynda bolyp kelgen 40-qa jýyq ókilettigi Parlament pen Úkimetke júkteletin bolady. Parlamenttiń Úkimet quramyn jasaqtaýdaǵy róli arta túspek. Bul qadam óz kezeginde halyqtyń bılikke degen senimin kúsheıtip, ishki saıası turaqtylyqtyń irgesin odan saıyn bekite túsedi. Sondaı-aq azamattardyń saıası oılaý mádenıetin arttyrýǵa erekshe serpin beredi dep bilemin.
Táýelsizdiktiń 25 jylynda prezıdenttik bılik ózin-ózi aqtady. Al qazirgi álemdik saıası jaǵdaıda eń damyǵan elderdiń qataryna ońtaıly kirigý úshin memlekettiń saıası júıesin ózgertýdiń kezi kelgenin Memleket basshysy dál anyqtaǵan. Bılik tarmaqtarynyń ókilettikterin arttyra otyryp, olardyń arasyndaǵy tepe-teńdikti qalyptastyrý arqyly qazirgi zamanǵy syn-qaterlerge barlyq memlekettik organdar men azamattardyń múddelilikteri artady dep senemin. Sonda baryp Qazaqstan qoǵamyna syrtqy jáne ishki qaýip-qaterlerdi shyǵynsyz eńserýge mol múmkindikter týyndaıdy. Biz óz tájirıbemizge súıenip qana ózgere de, jańara da alamyz. Sebebi, álemde saıası júıeni qaıta reformalaýdyń ámbebap modeli joq. Mundaı sapalyq turǵydan jańarý úderisine árbir el óz jolymen jetetin bolsa kerek», - dedi N. Myńjas.