«Táýelsizdikke tartý jasaımyz» degen qos qazaq boksshysynyń qarsylastary anyqtaldy

ASTANA. QazAqparat - «Táýelsizdikke tartý jasaımyz» degen qazaqtyń qos kásipqoı boksshysy Batyr Júkembaev pen Abylaıxan Qusaıynovtyń qarsylastary belgili boldy, dep habarlaıdy QazAqparat tilshisi.

Osyǵan deıin habarlaǵanymyzdaı, qos batyrymyz  ózderiniń áleýmettik jelisindegi jeke paraqshalaryna «16 jeltoqsan kúni sharshy alańǵa shyǵatyndaryn, bul kún QR Táýelsizdiginiń 25 jyldyq mereıtoıymen tuspa-tus kelip turǵanyn jazyp, Alla qalasa, Táýelsizdikke tamasha tartý jasaımyz degen úmittemiz», - dep jazǵan bolatyn.

Atalǵan eki boksshymyz 16 jeltoqsan (Astana ýaqyty boıynsha 17 jeltoqsan) kúni Kanadanyń Kvebek qalasynda kezekti jekpe-jekterin ótkizedi.

Batyr Júkembaevtyń (6-0, 6 KO) qarsylasy mesıkalyq boksshy - Manýel Marez.

Manýel Marez 1991 jyly týǵan. Kásipqoı bokstaǵy debıýt kezdesýin 2010 jyldyń 13 tamyzynda ótkizip, tehnıkalyq nokaýtpen utqan. Al sońǵy kezdesýin 2016 jyldyń 23 qazanynda ótkizip, jeńiliske ushyrady. Búginge deıin jalpy sany 26 kezdesý ótkizip, 16 ret jeńiske jetip, 10 ret jeńilgen. 14 qarsylasyn nokaýtpen utsa, 6 qarsylasynan nokaýtpen utylǵan.

Al ekinshi boksshymyz  Abylaıhan Qusaıynovtyń (3-0, 3 KO) qarsylasy da  meksıkalyq boksshy - Hesýs Peres.

Hesýs Peres 1990 jyly týǵan. Kásipqoı bokstaǵy debıýt kezdesýin 2011 jyldyń 9 qyrkúıeginde ótkizip, tehnıkalyq nokaýtpen jeńilgen. Al sońǵy kezdesýin 2016 jyldyń 23 qazanynda ótkizip, jeńiliske ushyraǵan. Búginge deıin jalpy sany 17 kezdesý ótkizip, 8 ret jeńiske jetedi, 8 ret jeńilip, 1 ret teń túsken. 5 qarsylasyn nokaýtpen utsa, 4 qarsylasynan nokaýtpen utylǵan.

Jekpe-jek Jan Paskal men Stepan Bojıch anderkartynda ótedi.