Táýelsizdikke 30 jyl: Myńnan astam aqmolalyq shańǵy jarysyna qatysty

KÓKShETAÝ. QazAqparat - Aqmola oblysynyń barlyq óńirlerinde el Táýelsizdiginiń 30 jyldyǵyna arnalǵan shańǵy jarysy ótti. Aktsııa qysqy sport túrleri men salaýatty ómir saltyn nasıhattaý maqsatynda uıymdastyryldy, dep habarlaıdy QazAqparat tilshisi oblystyq ishki saıasat basqarmasyna silteme jasap.

Shańǵy jolyna shyqqandar ár túrli jastaǵy jáne ár salada eńbek etetin bir myńnan astam aqmolalyq. Olardyń eń jasy segizde, eń úlkeni 80 shamasynda Jarysqa qatysýshylardy oblystyq dene shynyqtyrý jáne sport basqarmasynyń basshysy Áset Búkibaev quttyqtap, jarys jolynda jeńis tiledi.

«Barlyǵyńyzǵa ýaqyt bólip, osy jarysqa qatysqan úshin alǵysy bildiremin. Jyl saıyn osyndaı aýqymdy sporttyq is-sharalardyń kýási bolyp kelemiz. Jazda velojarystar, marafondar ótkizemiz, qysta konkı men shańǵymen syrǵanap jarysamyz. Bul sharalardyń barlyǵy óńirimizde buqaralyq sportty damytýǵa yqpal etedi», - dep atap ótti Áset Búkibaev.

Shańǵy jarysynyń eń úlken qatysýshysy Valerıı Sagaıdachyı 80 jasta. Qarııa sportpen shuǵyldanýdyń arqasynda ózin keremet sezinetinin aıtady.

«Men shańǵymen mektepte aınalysa bastadym. Sodan beri jyl saıyn shańǵy sportpen shuǵyldanyp kelemin. Osynyń arqasynda ózimdi sergek, jaqsy sezinemin. Kún saıyn tańǵy jattyǵýdan keıin shańǵymen syrǵanaımyn. Jastarǵa sportpen shuǵyldanýǵa keńes beremin», – dedi ardager sporshy.

Aıta keteıik, sońǵy jyldary óńirde dene shynyqtyrý jáne sportpen aınalysatyn azamattar sany artyp keledi. Búginde bul oblys turǵyndarynyń shamamen 36 paıyzy sportpen aınalysady. Oblys turǵyndaryna sport jáne jattyǵý zaldary, basseınder, stadıondar jáne dene shynyqtyrý-saýyqtyrý ortalyqtary qyzmet kórsetedi. Tek osy jyldyń ózinde sport ǵımarattarynyń sany 39 nysanǵa kóbeıdi. Qazirgi ýaqytta olardyń sany 2521 quraıdy.