Táýelsizdikke 30 jyl: Astanada 150 náreste «Súıinshi» baby-bokstaryn aldy
Elorda ákimdiginen málim etkendeı, Nur-Sultanda 16 jáne 17 jeltoqsan kúnderi 150-den astam sábı dúnıege keldi.
Eske salaıyq, «Súıinshi» syılyq jınaǵyna «Táýelsiz Qazaqstanǵa 30 jyl» estelik monetasy, týý týraly kýálik, jas ata-analarǵa arnalǵan aqparattandyrý broshıýralary, jańa týǵan nárestege arnalǵan túrli kerek-jaraqtar men gıgıena quraldary kiredi.
«Súıinshi» syılyq qoraptarynda sábılerge arnalǵan eń qajetti taýarlar bar. Onda Qazaqstan Respýblıkasynyń Prezıdenti Qasym-Jomart Toqaevtyń atynan quttyqtaý hat, el Táýelsizdiginiń 30 jyldyǵyna oraı shyǵarylǵan estelik moneta jáne balanyń týý týraly kýáligi berilgen. Perzenthanadan shyǵyp úlgergenderge syılyqtary «Qazposhta» arqyly úılerine jetkizildi.
Bizdiń qyzmetkerler perzenthanalardy aralap, bosanǵan áıelderden balanyń týý týraly kýáligin alýǵa tikeleı ótinish aldy. Málimetter atalǵan qujattardy daıyndaý úshin AHAT organdaryna jiberildi. Mereke kúnderi HQO, AHAT bólimderi, medıtsınalyq mekemeler, «Qazposhta» qyzmetkerleri osy bokstardy daıyndaý úshin jumys istedi», – dep habarlady «Azamattarǵa arnalǵan úkimet» memlekettik korporatsııasynyń Nur-Sultan qalasy boıynsha fılıaly dırektorynyń orynbasary Sabına Taýan.
Belgili bolǵandaı, úılerine jetkizý úshin 100-den astam syılyq jıyntyǵy oralǵan, al qalǵany «Qazposhta» arqyly joldanǵan.
«Qyzym 16 jeltoqsanda – el Táýelsizdiginiń 30 jyldyǵy kúni dúnıege keldi. Bul bizdiń kópten kútken tuńǵyshymyz. Endi jyl saıyn osy kúni eki merekeni atap ótetin bolamyz. Nazarlaryńyz ben qamqorlyqtaryńyzǵa alǵysym sheksiz. Mundaı syılyq alamyz dep kútpegen edik, kóńilimiz tipten kóterilip qaldy», – dep alǵysyn bildirdi jas ana Alına.