Táýelsizdikke 30 jyl: Aqmola oblysynda 6 mln sharshy metrge turǵyn úı salyndy
«Nurly jer» baǵdarlamasyn júzege asyrýdyń arqasynda 18 myńǵa jýyq aqmolalyq páter máselesin sheshti. Bıylǵy jyly baǵdarlama boıynsha óńirde 655 myń sharshy metr turǵyn úıdi paıdalanýǵa berý josparlanyp otyr. Osynyń arqasynda 5 myńnan astam aqmolalyq baspana máselesin sheshpekshi.
Oblystyq qurylys basqarmasynyń málimetinshe, on aıdyń qorytyndysy boıynsha 483 myń sharshy metr turǵyn úı paıdalanýǵa berildi, bul 3,2 myń aqmolalyq otbasynyń ómir súrý jaǵdaıyn jaqsartýǵa múmkindik berdi.
«Qarasha-jeltoqsan aılarynda eki myńǵa jýyq aqmolalyq otbasy ózderiniń turǵyn úı jaǵdaılaryn jaqsartady. «Nurly jer» baǵdarlamasy boıynsha 70 kóppáterli úıdiń qurylysy júrip jatyr, onyń ishinde 37 jalǵa beriletin, 33 kredıttik turǵyn úı», - dep atap ótti oblystyq vedomstvodan.
Óńirde muqtaj azamattar úshin jalǵa beriletin turǵyn úı qurylysy boıynsha jumystar belsendi júrgizilýde. Oblystyń áleýmettik osal sanattaǵy otbasylary úshin 411 jalǵa beriletin páter josparlanǵan, onyń ishinde 131 páter – kóp balaly otbasylarǵa arnalǵan.
Kredıttik turǵyn úı baǵdarlamasy boıynsha bıylǵy jyldyń Kókshetaý, Stepnogor, Ereımentaý jáne Makınsk qalalarynda aýdany 30,3 myń sharshy metr 459 páterlik 8 kredıttik úıdi paıdalanýǵa beriledi.
Sonymen qatar, Aqmola oblysynda «7-20-25. Árbir otbasy úshin turǵyn úı satyp alýdyń jańa múmkindikteri» baǵdarlamasy júzege asyrylýda. Bul rette, aımaq respýblıka boıynsha aldyńǵy bestikte. Baǵdarlamany júzege asyrý bastalǵannan beri 2 235 ótinim qabyldandy, qazirdiń ózinde 1 625 otbasy óz baspanaly boldy.
Aıta keteıik, jyl saıyn oblysta turǵyn úıdi paıdalanýǵa berý boıynsha oń dınamıka baıqalady. 2020 jyldyń qorytyndysy boıynsha 574 myń sharshy metr turǵyn úı paıdalanýǵa berildi – bul shamamen 5000 páter.