Táýelsizdik jyldaryndaǵy bilim júıesi týraly kitap jaryq kórdi

ALMATY: QazAqparat – Almatyda el Táýelsizdiginiń 30 jyldyǵy aıasynda «Qazaqstan Respýblıkasyndaǵy bilim berý júıesin jańǵyrtý» kitabynyń tusaýkeseri ótti, dep habarlaıdy QazAqparat tilshisi.

Kitaptyń avtory QR eńbek sińirgen qaıratkeri, pedagogıka ǵylymdarynyń doktory, professor, QR Ulttyq Ǵylym akademııasynyń akademıgi Alma Ábilqasymova.

Onyń aıtýynsha, kitapta elimiz Táýelsizdik alǵan 30 jylda Bilim júıesi qalaı damyp, jańǵyrǵany baıandalady.

«Kitapty jazýǵa qalam alý sebebim osy 30 jyldyń ishinde elimizde bilim júıesiniń sonshalyqty damyǵany, bilim júıesine memleket tarapynan kóptegen qoldaý kórsetilip, qomaqty jumystar jasalǵany arqaý boldy. Sondyqtan 30 jylda bilim júıesinde jasalǵan jumystyń barlyǵy kitapta jazyldy. Memleket, Elbasy tarapynan qabyldanǵan memlekettik baǵdarlamalar, Bilim jáne ǵylymdy damytý degen memlekettik baǵdarlamalar, Táýelsizdik alǵan kezdegi qıynshylyqtar. Sondaı-aq 1992 jyly qabyldanǵan Bilim zańy, osy zańnyń aıasynda talaı iske asqan sharýalar, oqýlyq jasaý tarapynan qabyldanǵan memlekettik qujattar barlyǵy qamtyldy», - deıdi Alma Ábilqasymova.

Almaty qalasy qoǵamdyq keńesiniń tóraǵasy, QR joǵary oqý oryndary qaýymdastyǵynyń prezıdenti, ekonomıka ǵylymdarynyń doktory, professor Rahman Alshanov avtor Táýelsizdik jyldary bilim salasynda eńbek etip, sol tustaǵy jaǵdaımen etene tanys ekenin tilge tıek etti.

«Kitaptyń avtory osy 30 jyldyq tarıhty jasaǵan adamnyń biri. Qazir el Táýelsizdiginiń birinshi kúninen bastap barlyq salada kóptegen qatelik ketti degen pikirler aıtylyp júr. Avtor sol kezdegi jaǵdaıdy naqty dálelmen keltirip jazǵan. Óıtkeni ózi sol úderistiń ishinde bolyp, júrip ótken tarıhty baıandaǵan. Bul jan-jaqty zerttelgen, tolyq qamtylǵan alǵashqy eńbek. Sonysymen qazirgi kóptegen suraqqa jaýap berip otyr», - deıdi Rahman Alshanov.