Táýelsizdik jyldarynda kedeıshilik 40-tan 3 paıyzǵa deıin qysqardy - Elbasy

NUR-SULTAN. QazAqparat - Shet memleketterdiń pragmatıkalyq optımızmi Qazaqstannyń saıası jáne ekonomıkalyq júıesine senimdiliktiń mańyzdy kórsetkishi. Bul týraly búgin XII Astana ekonomıkalyq forýmy barysynda QR Tuńǵysh Prezıdenti - Elbasy Nursultan Nazarbaev aıtty, dep habarlaıdy QazAqparat tilshisi.

«Men Qazaqstanǵa sengen jáne búgingi kúni de senim artyp otyrǵan seriktesterimizdiń, memleketterdiń, dostas ınvestorlardyń senimin joǵary baǵalaımyn. Mundaı pragmatıkalyq optımızmdi Qazaqstannyń saıası jáne ekonomıkalyq júıesine senimdiliktiń mańyzdy kórsetkishi sanaımyn. Bizdiń elimiz álemdik qoǵamdastyqtyń qurmetti múshesine aınaldy. Táýelsizdik jyldarynda ekonomıka 20 ese artyp, kedeıshilik 40-tan 3 paıyzǵa deıin qysqardy. Biz bul baǵytty nyǵaıtýdy jalǵastyramyz», - dedi Nursultan Nazarbaev.

QR Tuńǵysh Prezıdenti elimizdiń Syrtqy ister mınıstrligi shetel ınvestıtsııasyn tartý máselesinde negizgi organ sanalatyndyǵyn aıtty. Al sheteldegi Elshilikter Qazaqstanda jumys isteýge nıet tanytqan kez kelgen ınvestor úshin biryńǵaı terezege aınalady.

«Biz álemdegi eń damyǵan 30 eldiń qataryna kirý jumystaryn jalǵastyra beremiz. 2050 jylǵa deıin damý strategııasy qabyldanǵan. Bizdiń barlyq strategııamyz ben baǵdarlamamyz bir maqsatqa jumyldyrylǵan. Búkil Qazaqstan osy baǵytta jumys isteýde», - dedi Elbasy.