Táýelsizdik jyldarynda elimizge Japonııadan 10 mlrd dollar ınvestıtsııa keldi - Elbasy
Memleket basshysy jetekshi japon kompanııalary ókilderimen kezdesý óz sapary aıasyndaǵy asa mańyzdy is-sharanyń biri ekenin atap ótti.
- Osy sapardyń qorytyndylary bizdiń elderimiz arasyndaǵy strategııalyq áriptestikti jańa sapalyq deńgeıge kóterýde sheshýshi ról atqaratynyna senimdimin, - dedi Nursultan Nazarbaev.
Qazaqstan Prezıdenti eki el túrli baǵyttaǵy, sonyń ishinde munaı-gaz, metallýrgııa, qarjy salalary, taý-ken óndirisi boıynsha yntymaqtastyq ornatyp otyrǵanyn atap ótti. Respýblıkamyzda 50-den astam japon kásiporyndary jumys júrgizýde.
- Sonymen birge bizdiń qatynastarymyzdyń áleýeti tolyq paıdalanylyp otyrǵan joq. Sondyqtan búgingi kezdesýimiz saýda-ekonomıkalyq ózara is-qımylymyzdy jandandyrýǵa arnalady, - dedi Nursultan Nazarbaev.
Memleket basshysy elimizde bıznespen shuǵyldanýdyń jaǵdaıyn jaqsartý úshin júıeli sharalar qabyldanyp jatqanyn, Dúnıejúzilik banktiń «Bıznes júrgizý jeńildigi» reıtınginde Qazaqstan 35-orynǵa shyqqanyn atap ótti.
Qazaqstan Prezıdenti iskerlik ahýaldy odan ary jetildirý jáne el ekonomıkasynyń qurylymyn ózgertý úshin atqarylyp jatqan jumysqa nazar aýdardy.
- Shıkizatqa táýeldilikten arylý úshin memlekettik ındýstrıalyq-ınnovatsııalyq damý baǵdarlamasy júzege asyrylyp jatyr. Onda ekonomıkanyń basymdyǵy bar birneshe baǵyty aıqyndaldy. Olar - munaı óńdeý, munaı-gaz hımııasy, agrohımııa, qara jáne tústi metallýrgııa, tamaq ónerkásibi, kólik óndirisi jáne elektrotehnıkalyq mashına jasaý salalary. Basymdyǵy bar salalarda ınvestorlar korporatıvti tabys salyǵy men jer salyǵyn tóleýden 10 jylǵa, múlik salyǵynan 8 jylǵa bosatyldy, - dedi Nursultan Nazarbaev.
Memleket basshysy táýelsizdik jyldarynda bir ǵana Japonııadan kelgen ınvestıtsııanyń jalpy kólemi 10 mlrd dollarǵa jetkenin atap ótti.
- Bizde lıberaldy salyq rejimi jáne salyqty ákimshilendirý de ońtaılandyrylǵan, nebári 13 salyq qana bar. Jumyspen qamtý salasyndaǵy salyq mólsherlemelerine qatysty zańnamanyń turaqtylyǵyna kepildik berilgen. 2015 jyly biz álemdegi 35 eldiń azamaty úshin vızasyz rejim qoldanylatyn tizim quramyn ulǵaıttyq, kelesi jyly ol 56 memleketke deıin kóbeıtiledi. Japon ınvestorlary Qazaqstanǵa erkin kele alady, - dedi Qazaqstan Prezıdenti.
Nursultan Nazarbaev sondaı-aq elde jalpy quny 10 mlrd dollar mólsherindegi 800-ge jýyq kásiporyndy qamtıtyn jappaı jekeshelendirý baǵdarlamasynyń júzege asyrylýyna baılanysty paıda bolǵan múmkindikterge de nazar aýdardy.
Buǵan qosa, Qazaqstan Prezıdenti respýblıkada jeńildikter jıyntyǵy kózdelgen jáne ruqsat berý rásimderi jeńildetilgen arnaıy ekonomıkalyq aımaqtar, sonymen qatar qatysýshylarǵa qajetti ınfraqurylym memleket tarapynan qamtamasyz etiletin ındýstrııalyq aımaqtar jumys istep jatqany týraly habarlady.
- Biz japon kompanııalaryna óz jobalaryn iske asyrý úshin arnaýly jáne ındýstrııalyq aımaqtardan oryn bólýge ázirmiz. Tipti ondaı aımaqtardy japon kompanııalarynyń basqarýyna da berýge bolady, - dedi Nursultan Nazarbaev.
Elbasy «Astana» halyqaralyq qarjy ortalyǵyn qurý jobasyn iske asyrý úshin Tokıo tájirıbesiniń mańyzdy ekenine toqtalyp, ortalyqtyń bul saladaǵy álemdik úzdik tájirıbelerdi ıgerip, qazir Japonııanyń baǵaly qaǵazdar jónindegi dıllerleri qaýymdastyǵymen yntymaqtastyq ornata bastaǵanyn atap ótti.
Qazaqstan Prezıdenti japon kompanııalaryn halyqaralyq «EKSPO-2017» mamandandyrylǵan kórmesine qatysýǵa shaqyryp, «Aralas smart-tehnologııalar - tájirıbe men syn-qaterler» atty Japonııa pavılonynyń aýqymdy ári mazmundy bolady dep boljanyp otyrǵanyn jetkizdi.
Nursultan Nazarbaev Qazaqstannyń iri ekonomıkalyq bastamalary Japonııa bıznesiniń qyzyǵýshylyǵyn týdyratynyna senim bildirdi.
- Japonııa úkimetimen arada qol jetkizgen ýaǵdalastyqtardy isker toptar iske asyratyndyqtan, bizdiń búgingi kezdesýimiz asa mańyzdy. Sizdermen qarym-qatynasymyzdyń aıasyn keńeıtip, saýda men taýar aınalymyn ulǵaıtýǵa nıettimiz, - dedi Memleket basshysy.
Sondaı-aq, Qazaqstan Prezıdenti elimizdiń jańa Jibek joly jobasyna belsene qatysyp, kólik ınfraqurylymyn belsendi túrde jandandyryp jatqanyna nazar aýdardy. Bul logıstıka máselelerin sheship, eki el bıznesiniń ózara is-qımyly úshin jańa múmkindikterge jol ashatyn bolady.