Táýelsizdik jyldarynda elimizge 280 mlrd dollar shetel ınvestıtsııasy keldi

ASTANA. QazAqparat - Búgin Aqordada QR Memlekettik hatshysy Gúlshara Ábdiqalyqova Dúnıejúzilik banktiń Qazaqstandaǵy  turaqty ókili Ato Braýnmen kezdesti, dep habarlaıdy QazAqparat.

Ekijaqty kezdesý barysynda Qazaqstan men Dúnıejúzilik bank arasyndaǵy ynytmaqtastyqtyń ózekti máseleleri talqylandy. Qazirgi ýaqytta banktiń qatysýymen jalpy quny 8,1 mlrd  dollar bolatyn 46 jobanyń iske asyrylǵandyǵy atalyp ótildi.

G.Ábdiqalyqova bıyl Dúnıejúzilik bank pen Qazaqstan yntymaqtastyǵyna 25 jyl tolyp otyrǵandyǵyn aıtty. Bank shırek ǵasyr ishinde elimizdiń jekemenshilik sektoryn damytýǵa, qurylymdyq reformalar júrgizýge jáne ınfraqurylymdy jaqsartýǵa úlesin qosty.

Memlekettik hatshy 2017 jyly Qazaqstan Dúnıejúzilik banktiń «Bıznes júrgizý jeńildigi» reıtınginde 190 eldiń arasynda 51 orynnan 35 orynǵa kóterilgendigin atap ótti.

«Táýelsizdik jyldarynda elimizge kelgen tikeleı sheteldik ınvestıtsııanyń jalpy kólemi shamamen 280 mlrd dollar boldy», - dedi Gúlshara Ábdiqalyqova.

Taraptar ekijaqty yntymaqtastyqty damytýdyń qazirgi qarqynyna rızashylyq bildirdi.

Kezdesý sońynda QR Memlekettik hatshysy Dúnıejúzilik banktiń Qazaqstandyǵy turaqty ókili A.Braýnǵa múshe elderdiń turaqty ekonomıkalyq ósimin qamtamasyz etý jolynda sáttilik pen tabys tiledi.