Táýelsizdik jyldarynda 376 mlrd dollar shetel ınvestıtsııasy tartyldy - Muhtar Tileýberdi

NUR-SULTAN QazAqparat – Táýelsizdik jyldarynda elimizge 376 mlrd dollar shetel ınvestıtsııasy tartyldy. Bul týraly ınvestıtsııalar jónindegi dóńgelek ústel otyrysynda QR Premer-Mınıstriniń orynbasary – Syrtqy ister mınıstri Muhtar Tileýberdi aıtty, dep habarlaıdy QazAqparat tilshisi.

«Bıyl Qazaqstan Táýelsizdigiń 30 jyldyq mereıtoıyn atap ótedi. Sońǵy 30 jylda úlken ekonomıkalyq tabysqa qol jetkizdik. Jalpy ishki ónimi 170 mlrd dollarǵa jýyqtaıtyn Ortalyq Azııadaǵy eń iri ekonomıka sanalamyz. Óńirde jan basyna shaqqandaǵy JІÓ de eń joǵary sanalady ári halyqaralyq rezervimiz 90mlrd dollardan asady. Bul daǵdarys jáne naryqtaǵy qubylmaly jaıt oryn alǵankezde ekonomıka turaqtylyǵyn qamtamasyz etýge múmkindik beredi», - dep atap ótti mınıstr.

Onyń atap ótýinshe, osy jyldyń 9 aıynda elimizdiń jalpy ishki ónimi 3,5 paıyzǵa artty. Osylaısha, Qazaqstan ekonomıkasy pandemııaǵa deıingi ósim traektorııasyna shyqty deýge bolady. Óndiris pen qurylys sektory ósimniń negizgi kóshbasshysyna aınalyp, óziniń otasha kórsetkishnen asyp tústi. Qyzmet kórsetý sektory da oń qarqynǵa ıe bolyp, 9 aıdyǵ ishinde 2,7 paıyz ósim kórsetti.

«Qazaqstan ekonomıkasy damýynyń basty faktory tikeleı shetel ınvestıtsııasy tartý. Búginde ol 376 mlrd dollardan asyp tústi. Sheteldik iri kompanııalar Qazaqstannyń senimdi seriktesine aınalyp, yntymaqtastyǵymyzǵa úlken úles qosty. Sonymen qatar elimizdiń áleýmettik-ekonomıkalyq damýyna serpin berdi. Búgin biz jahandyq ınvestıtsııalyq qoǵamdastyqpen yntymaqtastyqtyń 30 jyldyǵyn atap ótemiz. Biz senimdi ınvestıtsııalyq seriktes retinde ózimizdi tanyta aldyq. Búgingi dóńgelek ústel ózara tıimdi yntymaqtastyǵymyzdy odan ary damytýǵa qosymsha serpin beretin bolady»,- dedi Muhtar Tileýberdi.