Táýelsizdik jyldary Qazaqstanda shahtadaǵy apattardan 160 adam qaza boldy
Lenın atyndaǵy shahtada apattan 5 kenshi qaza boldy
3 qarasha kúni saǵat 3.03-te «Arselor Mıttal Temirtaý» AQ Kómir departamentiniń Lenın atyndaǵy shahtasynda apat boldy.
«Oqıǵa bolǵan kezde shahtada 106 qyzmetker boldy, 101 adam jer betine kóterildi. 5 adam (baǵanaly bólik jumyskerleri) kóterý torlarynyń jumys isteýi úshin qaldy»,-dep málimdedi Qaraǵandy oblysy ákimdiginde.
«KÁAQQ ROSh» JShS Qaraǵandy fılıalynyń qutqarýshylary. Foto: centrspas.kz
Qazirgi tańda shahtanyń 5 qyzmetkeriniń denesi tabyldy. Oqıǵa ornyna oblys ákimi, qala basshysy jáne kompanııa jetekshileri, «Kómir» ÁQQQ avarııalyq-qutqarý qyzmeti bardy.
Lenın atyndaǵy shahtada 5 kenshiniń qaza tabýyna baılanysty qylmystyq is qozǵalyp, TJ faktisi boıynsha QR QK 277-baby 3-bóligi («Taý-ken nemese qurylys jumystaryn júrgizý kezinde qaýipsizdik erejelerin buzý») boıynsha qylmystyq is tirkeldi.
Lenın atyndaǵy shahta. Foto: naraione.org
«Oqıǵa ornynda Qaraǵandy oblysy polıtsııa departamentiniń jedel-tergeý toptary jumys istep jatyr. Qazirgi ýaqytta barlyq qajetti tergeý áreketteri júrgizilýde»,-dep habarlady Qaraǵandy oblysy PD baspasóz qyzmeti.
Memleket basshysy Qasym-Jomart Toqaev «ArselorMıttal Temirtaý» AQ shahtasynda qaza tapqan jumysshylardyń otbasylaryna kóńil aıtý jedelhatyn joldady.
«ArselorMıttal Temirtaý» aktsıonerlik qoǵamynyń shahtasynda bolǵan apat saldarynan qaza tapqan jumysshylardyń otbasylary men jaqyndarynyń qaıǵysyna ortaqtasyp, kóńil aıtamyn. Zardap shekken azamattardyń tezirek saýyǵyp ketýine tilektestik bildiremin. Úkimetke jáne Qaraǵandy oblysynyń ákimine apat sebepterin anyqtaý úshin shuǵyl sharalar qabyldaýdy jáne qaıtys bolǵan jáne zardap shekken azamattardyń otbasylaryna tıisti kómek kórsetýdi tapsyrdym»,-dep jazylǵan jedelhatta.
Buǵan deıin Memleket basshysy Qasym-Jomart Toqaev Qaraǵandy oblysyna barǵan saparynda aımaqtyń óndiristik kásiporyndarynda eńbek qaýipsizdigin qamtamasyz etý máselesi áli kúnge syn kótermeıtinin atap ótip, kásiporyndardyń jaýapkershiligin kúsheıtetin júıeli sharalar qabyldaýǵa tapsyrma bergen edi.
«Qaraǵandy sııaqty ındýstrııasy damyǵan oblys úshin bul – mańyzdy másele. Mysaly, tek 2022 jyly «ArselorMıttalTemirtaý» AQ obektilerinde jumysshylar qaza tapqan birneshe oqıǵa tirkeldi. Іri kompanııalar óndiristi jańǵyrtýǵa árdaıym ınvestıtsııa quıýy kerek. Ýákiletti organdar óndiristik apattardyń kóbeıgeni úshin kásiporyndardyń jaýapkershiligin kúsheıtetin júıeli sharalar qabyldaýy qajet»,-degen edi Prezıdent.
Al Senat depýtattary «Arselor Mıttaldyń» máselesi boıynsha búgin Bas prokýratýraǵa saýal joldady. «Bizdiń ınvestorlarǵa nemese kásiporyndardyń basshylaryna qoıatyn eń negizgi talabymyzdyń biri – qaýipsizdik erejelerin saqtaý. «Arselor Mıttaldyń» kásipornynda buǵan deıin bolǵan apattarǵa qatysty prokýratýra organdary áreketsiz boldy dep oılamaımyn. Bálkim áreket etken shyǵar, ony biz bilmeıtin shyǵarmyz... Eń áýeli bul kompanııa basshylarynyń, ókilderiniń kinási bar ekenin, sondaı-aq oqıǵa saldaryna olardyń áreketi nemese áreketsizdigi qalaı áser etkenin anyqtaý kerek. Bizdiń tıisti organdardyń tergeýdi qalaı júrgizetinine jáne munyń bárin dáleldeı alatynyna kóp nárse baılanysty»,-dedi Senat depýtaty Qaırat Qojamjarov.
Táýelsizdik alǵaly shahtalarda bolǵan apattar
Qazaqstannyń táýelsizdik alǵannan beri shahtalarda bolǵan apattarǵa nazar aýdarsaq, elimizdiń tarıhyndaǵy eń iri apattar «Arselor Mıttal Temirtaý» AQ Shahtınsk qalasyndaǵy Lenın atyndaǵy shahtasynda bolǵanyn baıqaımyz. Máselen, atalǵan shahtada 2006 jyly metan jarylyp, saldarynan 41 adam kóz jumdy. Al 1995 jyly dál osyndaı apattyń kesirinen 13 kenshi qaza tapqan edi.
Foto:shahtinsk.ru
Tipti Májilis depýtaty Gúlnar Bıjanova palatanyń jalpy otyrysynda «ArselorMıttal Temirtaý» kelisimshart aýmaǵynda kómir qabattarynyń joǵary gazdanýy saldarynan birshama shahter qaza tapqanyn tilge tıek etip, QR Premer-Mınıstriniń orynbasary Roman Sklıardyń atyna depýtattyq saýal da joldaǵan bolatyn.
«1997-2021 jyldar aralyǵynda «ArselorMıttal Temirtaý» kelisimshart aýmaǵyndaǵy kómir qabattarynyń joǵary gazdanýy sebebinen shahtalarda 130 adam qaza taýyp, jaraqat aldy»,-dedi Gúlnar Bıjanova.
Elimizde 30 jyl ishinde shahtada búgingini qosqanda 12 apat bolyp, odan ondaǵan adam qaıtys boldy. Qazirgi tańda kompanııalardyń basshylary men memleket qaýipsizdik sharalaryn kúsheıtýi kerek.
«Aqtas» shahtasyndaǵy órt (1994 jyl)
1994 jyly 16 naýryzda Qaraǵandy oblysy Saran qalasynyń mańyndaǵy Aqtas aýylyndaǵy shahtada órt shyǵyp, 11 adam qaza tapty. Órtti sóndirý kezinde órtti sóndiretin ınertti gaz beriletin qubyr úzilip, onyń ishindegi gaz taý-ken qutqarýshylary jumys istep jatqan ýchaskege tarady.
«Qazaqstan» shahtasynda metan jaryldy (1994 jyl)
Qaraǵandy mańynda ornalasqan «Qazaqstan» shahtasyndaǵy jarylys 1994 jyldyń 7 shildesinde bolǵan. Úıindi astynda 14 adam qaza tapty.
Lenın atyndaǵy shahtada metan jaryldy (1995 jyl)
1995 jyldyń 24 qarashasynda Qaraǵandy oblysy Shahtınsk qalasynda bolǵan tótenshe jaǵdaı 13 adamnyń ómirin qıdy.
Lenın atyndaǵy shahtada metan jaryldy (2006 jyl)
Tótenshe jaǵdaılar ishinde eń kóp adam qaıtys bolǵan aýqymdy oqıǵa 2006 jyldyń 20 qyrkúıeginde boldy. Jarylys jeldetý qubyrlaryn aýystyrý kezinde qaýipsizdik tehnıkasynyń buzylýyna baılanysty shyqty. Tótenshe jaǵdaıdan 41 adam qaıtys boldy. Oqıǵadan keıin alty jumysshy sottaldy.
Jarylys kezinde qyzmetkerlerdiń ornalasý shemasy 2006 j. Foto:shahtinsk.ru
«Abaı» shahtasynda metan jaryldy (2008 jyl)
2008 jyldyń 11 qańtarynda Qaraǵandy oblysynyń Abaı qalasyndaǵy shahtada bolǵan qaıǵyly oqıǵadan 30 shahter qaza tapty. Tótenshe jaǵdaıdy tergeý barysynda ónerkásip qaýipsizdigin baqylaýǵa jaýapty eki sheneýnik qyzmetinen aıyryldy.
«Abaı» shahtasynda qaza tapqan kenshilerdi eske alýǵa arnalǵan memorıal.
Foto: ugolkaraganda.wordpress.com
«Saran» shahtasyndaǵy tótenshe jaǵdaı (2016 jyl)
2016 jyldyń 10 qarashasynda Qaraǵandy oblysynyń shahtalarynda iri apat boldy. «ArselorMıttalTemirtaý» kompanııasynyń «Saran» shahtasynda jumysshylar joǵaryǵa kóterilgen kezde arbanyń trosy úzildi. Saldarynan úsh adam oqıǵa ornynda qaıtys boldy, taǵy bireýi aýrýhanada kóz jumdy.
«Abaısyzda eki nemese odan da kóp adamnyń ólimine ákep soqqan eńbekti qorǵaý qaǵıdalaryn buzý» baby boıynsha apatqa shahtanyń úsh jumysshysy – kabınany montajdaǵan jumysker, mashınıst jáne ýchaske bastyǵy kináli dep tanyldy. Úsheýi de bes jylǵa bas bostandyǵynan aıyryldy.
«Qazaqstan» shahtasyndaǵy apat (2017 jyl)
2017 jyldyń 31 tamyzynda saǵat 04:21-de Qaraǵandy oblysy Shahtınsk qalasynda «ArselorMıttal Temirtaý» AQ KD «Qazaqstan» shahtasynda jeldetý túıisiminde kenet kómir men gaz atqylaǵan. Sol ýaqytta shahta ishinde 136 adam bolǵan, onyń ishinde úsh adam avarııalyq qazbada bolǵan. Saǵat 05:35-te shahta qyzmetkeri zardap shekken úsh adamnyń máıitin tapty.
Tótenshe jaǵdaı saldarynan 3 adam qaıtys boldy.
Shyǵys Qazaqstandaǵy jarylys (2020 jyl)
2020 jylǵy 16 maýsymda Shyǵys Qazaqstan oblysynda ornalasqan «Shyǵystústimet» JShS Orlov óndiristik kesheniniń shahtasynda jarylys jumystaryn júrgizý kezinde eki jumysshy qaza tapty. Taǵy bir shahter aýrýhanaǵa jetkizildi. Oqıǵa keshki saǵat on shamasynda Borodýlıha aýdanynyń aýmaǵynda boldy.
Aqtóbede 4 adam gazdan ýlandy (2020 jyl)
Qaıǵyly oqıǵa 2020 jyldyń 30 jeltoqsanynda keshke jarylys jumystary kezinde boldy. «Aqtóbe Mys kompanııasy» JShS-niń tórt qyzmetkeri qaıtys boldy.
Ólimniń aldyn ala sebebi – gazdan ýlaný. Kenishtegi jumystar toqtatylyp, qyzmetkerler jer betine shyǵaryldy.
Fakt Qylmystyq kodekstiń 156-babynyń 4-bóligi «abaısyzda eki nemese odan da kóp adamnyń ólimine ákep soqqan eńbekti qorǵaý qaǵıdalaryn buzý» boıynsha sotqa deıingi tergep-tekserýdiń biryńǵaı tiziliminde tirkeldi.
«Abaı» shahtasynda metan jaryldy (2021 jyl)
2021 jyldyń 7 qarashasynda saǵat 09:30-da Qaraǵandy oblysy Abaı qalasyndaǵy «Abaı» shahtasynyń kenjarynda metan jaryldy. Shahtada 64 qyzmetker bolǵan, 56 adam birden evakýatsııalandy. 3-K10 kenjarynda segiz jumysshy qalǵan, onyń ishinde alty adam qaıtys boldy, ekeýi gazdan ýlandy. Olar aýyr jaǵdaıda aýrýhanaǵa tústi.
«Saran» shahtasynda taý-ken massasy qulady (2022 jyl)
Qaraǵandy oblysynda «Saran» shahtasynda taý-ken massasy qulap,57 jastaǵy kenshi qaza tapty, Shahta «ArselorMıttal Temirtaý» AQ kásipornyna tıesili. Qaıǵyly oqıǵa 2022 jylǵy 24 naýryzda boldy.
Aıta keteıik, elimiz táýelsizdik alǵan 30 jyl ishinde Qazaqstan shahtalarynda 12 iri apat bolyp, saldarynan 160 adam qaza boldy.
Basty foto iqreview.ru saıtynan alyndy