Táýelsizdik jyldary «qara altyn» óndirisi úsh ese artty

ASTANA. 15 jeltoqsan. QazAqparat - Táýelsizdik jyldary munaı-gaz salasy elde júrgizilgen áleýmettik-ekonomıkalyq refor­malardy qoldaýdyń birden-bir faktory bolǵany aıqyn.

Búginde JІÓ-niń tórtten bir bóligi jáne memlekettik bıýdjetke túsetin tabystyń jartysy­nan astamy osy salanyń úlesinde. Jıyrma jyl­dyń ishinde munaı óndirisi úsh ese artty. Salystyrý úshin aıtsaq, 1992 jyly 25,8 mln tonna «qara altyn» óndirilse, 2012 jyly 80 mln tonnany qurady. Sondaı-aq gaz óndirý kólemi bes esege ósip, jylyna 40 mlrd tekshe metrge jetti. Táýel­sizdik jyldary munaı-gaz salasyna 60 mlrd dollar ınvestıtsııa tartylsa, onyń 20 mıllıony sońǵy bes jylda quıylǵan, dep jazady «Alash aınasy» basylymy.

Osy salada iske qosylǵan eń sońǵy iri joba - Qashaǵan. Sonymen birge ol sońǵy 40 jyldyń ishindegi álemdegi eń qymbat energetıkalyq joba sanalady. Qashaǵan ken ornyndaǵy geologııalyq qor 4,8 mlrd tonna dep baǵalanǵan. 2015 jyly bul kenishtegi munaı óndirý kólemi jylyna 13 mln tonnany quraıdy dep josparlanǵan. Qashaǵandy damytý kezeńderin esepke alǵanda, ármen qaraı munaı óndirý kólemi jylyna 51 mln tonnaǵa jetkizilmek.