«Táýelsizdik urpaqtary» grantynyń ıegeri: Armanym - balalar sahnada oınaıtyn biregeı teatr ashý

NUR-SULTAN. QazAqparat - Qazaq ulttyq óner ýnıversıteti kolledjiniń oqytýshysy Dýman Ákim «Táýelsizdik urpaqtary» grantyn jeńip aldy. Grantty búgin Aqordada Memleket basshysy Qasym-Jomart Toqaev tabys etti, dep habarlaıdy QazAqparat tilshisi.

Grant Dýman Ákimge «Táýelsizdik qurdastary» konkýrsynyń mádenıet baǵyty boıynsha teatr, shyǵarmashylyq, talant halyqaralyq balalar-jasópirimder teatr festıvali konkýrsyn uıymdastyrý jobasy úshin berildi.

«Osydan jarty byl buryn grantqa qujat tapsyrǵan kezde Aqordada grant jeńimpazy retinde sóz sóıleımin degen oı múldem bolǵan joq. Bul men úshin zor mártebe ári tarıhta qalatyn sát dep bilemin. Jastarymyzdyń tanymy tereń tulǵa bolyp qalyptasýy úshin mádenıettiń orny erekshe. Osyǵan oraı óskeleń urpaqty teatr ónerine qyzyqtyrý maqsatynda Teatr, shyǵarmashylyq, talant atty joba ázirlegen bolatynmyn. Biz bul joba aıasynda balalar men jetkinshekterge arnalǵan halyqaralyq teatr festıvalin uıymdastyramyz. Armanym - bolashaqta balalar sahnada oınaıtyn biregeı teatr ashyp, elimizdi mádenıet, óner arqyly álemge áıgili etý», - deıdi grant jeńimpazy.

Sonymen qatar ol Memleket basshysy Qasym-Jomart Toqaevqa jastarǵa qoldaý kórsetip kele jatqany úshin rızashylyǵyn bildirdi.

«Bolam degen balanyń betin qaqpa, belin bý» demekshi, siz óskeleń urpaq máselesin árdaıym aıryqsha nazarda ustap, bizge jan-jaqty qoldaý kórsetip otyrasyz. Búgingi tańda, egemendiktiń mereıli jylynda daryndy jastarǵa arnaýly grant taǵaıyndap, bizderge osyndaı múmkindik berip jatqanyńyzǵa úlken alǵysymyzdy bildiremiz. Búgin táýelsizdik urpaqtaryna erekshe qurmet kórsetilip, zor úmit artady», - dedi Dýman Ákim.

Foto: dumanakim.kz