Táýelsizdik toıyna eńsesi bıik, áleýeti zor el retinde jetip otyrmyz - BQO ákimi

ORAL. QazAqparat - Batys Qazaqstan oblysynyń ákimi Altaı Kólginov Aq Jaıyq óńiriniń jurtshylyǵyn Táýelsizdiktiń 25 jyldyǵymen quttyqtady, dep habarlaıdy QazAqparat tilshisi.

«Qurmetti batysqazaqstandyqtar!

Sizderdi Qazaqstan Respýblıkasynyń Táýelsizdik kúni merekesimen shyn júrekten quttyqtaımyn!

Azattyq alǵannan keıin eldigimizdi qalyptastyryp, eńsemizdi tiktegen Elbasy Nursultan Ábishuly Nazarbaev «Biz altyn taqqa otyrǵan asqaq dáýirlerdi de, ózgeniń bodanynda bolǵan ker zamandy da bastan keshken elmiz. Sondyqtan halqymyz azattyq rýhyn tereń sezinip, jan-júregimen túsine biledi. Azattyq  Uly dalany meken etken atalarymyzdyń asyl armany edi. Biz osy asqaq armanǵa qol jetkizdik. Osyny tereń seziný patrıotızm men memlekettilikti nyǵaıtýǵa múmkindikter týǵyzady» dep atap ótti.  

Táýelsizdigimizdiń 25 jyldyq mereıtoıyna eńsesi bıik, áleýeti zor, eldigi qalyptasqan memleket retinde jetip otyrmyz.

Azattyq jyldaryndaǵy elimizdiń damý tarıhynan Batys Qazaqstan oblysy da shet qalǵan emes. Óndiris kólemi 3 myń esege deıin ósti. Óńirimizde osy kezeńde 60 mektep, 17 balabaqsha, 103 densaýlyq saqtaý nysany salyndy. Qarjylandyrýdyń barlyq kózinen 4 mln. sharshy metr turǵyn úı boı kóterdi.

Bıyldyń ózinde 14 turǵyn úı salynyp, barlyǵy 1500 páter paıdalanýǵa beriledi. Qorytyndylap otyrǵan jylymyzda ǵana 215 áleýmettik jáne ınfraqurylymdyq nysan jańartyldy. Jyldyń sońyna deıin kópbeıindi qalalyq aýrýhana qoldanysqa beriledi.  Memlekettik baǵdarlamalardyń paıdasyn sezinip otyrǵan óńirimizde aldaǵy jyldary da birqatar máseleler sheshimin tabady.

Shırek ǵasyrlyq jetistikterimiz ben qol jetkizgen asyl muratymyzdyń barlyǵy da - táýelsizdigimizdiń baıandy bolýyna basty kepil bolǵan birlik pen yntymaqtyń arqasy.

Qadirli batysqazaqstandyqtar!

Sizderdi elimiz úshin qasıetti de qasterli merekemen quttyqtaı otyryp, Otanymyzǵa tynyshtyq, otbasylaryńyzǵa amandyq tileımin!» delingen quttyqtaýda.