Táýelsizdik tartýy: Aqmola oblysynda balyq óńdeıtin tseh ashyldy

KÓKShETAÝ. QazAqparat - El Táýelsizdiginiń 30 jyldyǵyna oraı, mereke kúnderi qarsańynda Qorǵaljyn aýdanynda balyq óńdeıtin tseh ashyldy. Bul Abaı aýylynda ashylǵan tseh óńirdegi balyq óńdeıtin jalǵyz óndiris orny, dep habarlaıdy QazAqparat tilshisi oblystyq ishki saıasat basqarmasyna silteme jasap.

Nysannyń ashylýyna Qorǵaljyn aýdanynyń ákimi Berik Janbaev, Qorǵaljyn aýdany ákiminiń orynbasary Daryn Sabyrǵalıuly, máslıhat hatshysy Berik Oralbaıuly qatysty. Kásipker Ersaıyn Hasenov myrza shaǵyn jáne orta bıznesti qoldaý baǵdarlamalary boıynsha óndiriske qajetti qurylǵylar alýǵa 30 mıllıon teńge somasyna nesıe aldy.

Búgingi tańda kásipker óz esebinen 20 mıllıon teńge somasyna aýdany 100 sharshy metr óndiristik ǵımarat salyp, balyq óńdeıtin tseh jumysyn bastady. Aldaǵy ýaqytta kásipker balyq ónimderine jeke-jeke sertıfıkat alady. Tsehta Qorǵaljyn aýdanyndaǵy kólderde meken etetin balyqtardan qatyrylǵan jartylaı daıyn kotletter, tartylǵan balyq eti sekildi taǵam túrleri óndiriletin bolady. Daıyn ónim eń aldymen Qorǵaljyn aýdany dúkenderine satylymǵa shyǵarylyp, keıin oblys aýmaǵy jáne Nur-Sultan qalasy saýdaǵa shyǵarylady.

Kásipkerdiń aıtýynsha kásiporynǵa bastapqy merzimde 4-5 adam jumysqa alynyp, olardy arnaıy jabdyqtarmen jumys jasaýǵa oqytý da josparlanýda. Osyndaı baǵyttaǵy kásiporyn ashýǵa úsh jyl merzimi jumsalǵan. Tsehtyń jumysy alǵa basatyn bolsa, aýdannyń ekonomıkalyq áleýetin kóterýge úlken tabys ákeletini sózsiz.