Táýelsizdik tarlandary: Aqmola oblysynyń belsendi jastary marapattaldy

KÓKShETAÝ. QazAqparat - Aqmola oblysynyń Astrahan aýdanynda Qazaqstan Respýblıkasy Táýelsizdiginiń 30 jyldyǵyna arnalǵan «Táýelsizdik tarlandary» atty jastar forýmy ótti.

Sharada óńirde jastar saıasatyn damytýǵa úles qosqan belsendi jastar marapattaldy, dep habarlaıdy QazAqparat tilshisi oblystyq ishki saıasat basqarmasyna silteme jasap.

«Sizder Qazaqstannyń jas urpaǵysyzdar. Búgingi jastar adamnyń zııatkerlik jáne shyǵarmashylyq áleýetin júzege asyrýǵa tolyq erkindigi bar ýaqytta ómir súrý baqytyna ıe bolyp otyr. Memleketimiz óz kezeginde túrli salalarǵa, sonyń ishinde bilim berý, densaýlyq saqtaý, ǵylym, shaǵyn jáne orta bıznesti damytý, mádenıet jáne sport salalaryna qamqorlyq jasap, qoldaý kórsetýde. Ásirese, aýylǵa jumysqa kelgen jas mamandarǵa úlken kóńil bólinip otyr. 2021 jyly bizdiń aýdanǵa 13 jas maman keldi, olarǵa «Dıplommen aýylǵa» baǵdarlamasy boıynsha jalpy somasy 55 mıllıon teńgeden astam turǵyn úı alýǵa jerasty jáne bıýdjettik nesıeler berildi», - dep atap ótti aýdan ákiminiń orynbasary Janar Shaqputova.

Astrahan aýdanynda kóptegen baıqaýlar men olımpıadalarǵa qatysyp, joǵary kásibılik deńgeıin kórsetip júrgen jas pedagogtar barshylyq. Solardyń arasynda Serikgúl Omarbekova, Tólepbergen Buǵybaı, Aıbat Imantaeva sııaqty jastar aýdan maqtanyshyna aınalǵan. Aýdanda jastary arasynda sportty damytý, salaýatty ómir saltyn qalyptastyrý mańyzdy memlekettik mindetke aınaldy. Osy mereıtoılyq jyly Astrahan aýdanynyń jas sportshylary týǵan óńirin jańa jeńisterimen qýantyp otyr. Máselen, Jambyl Ospanov – gir sportynan Álem chempıonatynyń jáne Azııa chempıonatynyń kúmis júldegeri, Abaı Ánýarbekov jastar arasyndaǵy Azııa chempıonatynyń kúmis júldegeri, ıÝrıı Klımek Prezıdenttik kópsaıystan Qazaqstan chempıony, Aınur Dúısenbek áıelder kúresinen Qazaqstannyń qola júldegeri atandy.

Sonymen qatar, aýdan jastary Prezıdent Qasym – Jomart Toqaevtyń eriktilikti damytý týraly úndeýin qabyldady jáne osy baǵyttaǵy jumysty belsendi jalǵastyrýda.

«Búginde jastardyń el ómirindegi basty rólderiniń birin atqaratynyna eshkimniń kúmáni joq. Elimizdiń tabystary men jetistikteri jastardyń qoǵamdyq-saıası ómirge qatysýy men belsendiligimen tyǵyz baılanysty. Jastardy damytýǵa baǵyttalǵan jastar saıasaty aıasynda júzege asyrylyp jatqan barlyq jobany memlekettiń bolashaǵyna salynǵan ınvestıtsııa dep bilýge bolady. Sebebi eldiń erteńgi jas urpaqtyń qolynda», - dedi Astarhan aýdandyq ádenıet úıiniń kórkemdik jetekshisi, «Asyljan» qaıyrymdylyq qorynyń negizin qalaýshy Asyljan Pırbergenov.

Forým aıasynda Táýelsizdik qurdastarynyń Astrahan agrotehnıkalyq kolledjiniń oqýshylarymen kezdesýi ótti.